MADRID, 28-iyun. /"Dunyo" AA/. San-Pablo universiteti Ijtimoiy tadqiqotlar instituti professori, Markaziy Osiyo mintaqasi bo'yicha ekspert Antonio Alonso (Ispaniya) "Dunyo" AA uchun intervyusida O'zbekiston Prezidenti Shavkat Mirziyoyevning 27-iyun kuni Minsk shahrida bo'lib o'tgan Oliy Yevroosiyo iqtisodiy kengashining (YOIK) navbatdagi yig'ilishidagi ishtiroki haqidagi fikrlarini bildirdi:

– O'zbekiston Prezidenti uzoqni ko'ra oladigan, strategik fikrlaydigan, nafaqat dolzarb muammolarni tez ilg'aydigan, balki mintaqaviy va xalqaro miqyosda barqaror rivojlanish mexanizmlarini taklif eta oladigan yetakchi timsolini shakllantirishda davom etmoqda. Uning Minsk shahrida bo'lib o'tgan Oliy Yevroosiyo iqtisodiy kengashining navbatdagi yig'ilishida ishtirok etishi, o'tgan yillardagidek, kuzatuvchi davlat maqomi davom etayotganiga qaramay, O'zbekistonning Yevroosiyo iqtisodiy ittifoqi (YEOII) bilan hamkorlikni kengaytirish va chuqurlashtirish borasidagi izchil yo'nalishidan dalolat beradi.

E'tiborlisi, kuzatuvchi formati doirasida O'zbekiston hozirdanoq faol integratsiya siyosatini amalga oshirmoqda. Mamlakatingiz yetakchisi YEOII davlatlari bilan hamkorlikning savdo va sanoatdan tortib, raqamlashtirish va agrosanoat sohasigacha bo'lgan 20 dan ortiq yo'nalishlarini qamrab olgan tashabbuslarni ilgari surdi. Bunday yondashuv keng qamrovli bo'lib, nafaqat O'zbekiston manfaatlariga xizmat qiladi, balki Ittifoqning o'zining strategik ustuvor yo'nalishlari – sanoat kooperatsiyasini chuqurlashtirish, texnologik suverenitetni ta'minlash va mintaqaning barqaror rivojlanishiga ham javob beradi.

Ayniqsa, Prezident Shavkat Mirziyoyevning O'zbekistonni Yevroosiyo taraqqiyot bankiga a'zo bo'lish to'g'risida qabul qilgan qarori siyosiy va iqtisodiy jihatdan e'tiborga molik. Bu shunchaki ramziy qadam emas, balki uzoq muddatli investitsiya loyihalarini amalga oshirishdan manfaatdor ishonchli va bashorat qilinadigan hamkor sifatida mamlakatimizning Yevroosiyo makonidagi mavqeini mustahkamlash niyatidan dalolatdir.

O'zbekiston raqamli temir yo'l transporti, iqlim kun tartibi va transchegaraviy elektron tijorat bo'yicha YEOIIning pilot loyihalarida ishtirok etayotgani ahamiyatlidir. Bular Yevroosiyo iqtisodiy makonining kelajakdagi arxitekturasi uchun asosdir.

Prezident Shavkat Mirziyoyev, shubhasiz, buni nafaqat texnik hamkorlik, balki barqaror o'sishni ta'minlash, jadal texnologiyalar almashinuvi va inklyuziv rivojlanish vositasi sifatida ko'radi.

O'zaro savdoga to'siqlarni bartaraf etish, shuningdek, YEOII mamlakatlari fuqarolarining ichki hujjatlardan foydalangan holda O'zbekistonga pasportsiz kirish imkoniyatini joriy etish tashabbusi ham qiziqish uyg'otmoqda. Bu nafaqat mamlakatlar o'rtasidagi o'zaro hamkorlikni soddalashtirish, balki gumanitar va madaniy sohalarda ham bosqichma-bosqich yaqinlashishga qaratilgan dadil qadamdir.

Shuningdek, davlatingiz rahbari rahnamoligida integratsiyaga tizimli va institutsional yondashuvni namoyish qiluvchi YEOIK bilan o'zaro hamkorlikni muvofiqlashtirish bo'yicha idoralararo ishchi guruhi tuzilganini ham alohida ta'kidlash lozim. Bu model boshqa kuzatuvchi davlatlar uchun namuna bo'lib, belgilangan maqsadlarni samarali amalga oshirish imkonini beradi.

Boshqacha aytganda, O'zbekiston Prezidentining YOIIga nisbatan siyosati – bu suverenitetni hurmat qilish, jarayonning barcha ishtirokchilari manfaatlarini hisobga olish va Yevroosiyoda barqaror rivojlanishning umumiy arxitekturasini shakllantirish istagiga asoslangan ochiq, pragmatik, o'zaro manfaatli hamkorlik siyosatidir. Uning harakatlari mintaqa davlatlari o'rtasidagi ishonchni mustahkamlaydi va integratsiya jarayonlariga yangi sur'at bag'ishlaydi.