RIGA, 4-iyul. /"Dunyo" AA/. Latviya Xalqaro Markaziy Osiyo va Yaqin Sharq siyosiy tadqiqotlar instituti prezidenti Aydin Askerov "Dunyo" AA uchun intervyusida O'zbekiston Prezidenti Shavkat Mirziyoyevning 2-4-iyul kunlari Ozarbayjonga buyurgan davlat tashrifi haqidagi fikrlarini bildirdi:

– Tashrif tarixan yaqin bo'lgan ikki davlat o'rtasidagi strategik sheriklik munosabatlarini mustahkamlash yo'lidagi muhim qadam bo'ldi.

Mintaqaviy miqyosda sanoat, xalqaro avtomobil aloqasi, turizm, noqonuniy migratsiyaga qarshi kurashish, karantin va o'simliklarni himoya qilish, harbiy va harbiy-texnikaviy hamkorlik sohalarida o'zaro sheriklikni faollashtirishni rag'batlantiruvchi juda ta'sirli kelishuvlar to'plamining imzolanishi orqali keng qamrovli aloqalarni yanada chuqurlashtirish jarayoni shundan dalolat beradi.

O'zbek va ozarbayjon xalqlarining til, diniy, madaniy qadriyatlar va sivilizatsiyaviy hamjamiyat, iqtisodiyotlarning bir-birini to'ldiruvchi tabiati hamda ikki mamlakat rahbarlari o'rtasidagi o'zaro ishonchning yuksak darajasi davlatlararo muloqot uchun eng oliy darajadagi mustahkam poydevor bo'lib xizmat qilmoqda.

Global yetkazib berish zanjirlaridagi uzilishlar, jumladan, yangi geosiyosiy voqeliklar fonida, O'zbekiston va Ozarbayjon rahbarlarining mintaqalararo sheriklikni chuqurlashtirish bo'yicha olib borgan mazmunli muzokaralar o'z vaqtida va o'zaro manfaatli bo'ldi. Shu nuqtai nazardan Toshkent va Boku Markaziy Osiyo, Janubiy Kavkaz hamda Yevropa va Osiyo qit'alari davlatlari o'rtasida o'zaro bog'lovchi ko'prik bo'lishi mumkin.

Prezident Shavkat Mirziyoyevning Ozarbayjonga davlat tashrifi uzoq istiqbolda ikki do'st va qardosh mamlakat o'rtasidagi har tomonlama strategik sheriklik hamda hamkorlik munosabatlarini yanada jadal rivojlantirishga xizmat qiladi.