TOSHKENT, 23-iyun. /"Dunyo" AA/. Mo'g'uliston poytaxti Ulan-Bator shahrida O'zbekiston Prezidenti Shavkat Mirziyoyevning davlat tashrifi arafasida bugun O'zbekiston–Mo'g'uliston biznes-forumi bo'lib o'tdi, deb xabar qilmoqda "Dunyo" AA muxbiri.

Investitsiyalar, sanoat va savdo vazirligi (ISSV) ma'lumotiga ko'ra, tadbirda ikki mamlakatning vazirlik va idoralari, hududlar, tarmoq uyushmalari rahbarlari hamda 300 dan ortiq kompaniya vakillari ishtirok etdi. Forum O'zbekiston Investitsiyalar, sanoat va savdo vazirligi tomonidan Savdo-sanoat palatasi ko'magida tashkil etildi.

Forumda O'zbekiston delegatsiyasiga O'zbekiston Bosh vazirining o'rinbosari Jamshid Xodjayev, Mo'g'uliston tomoniga esa Mo'g'uliston Bosh vazirining o'rinbosari Saynbuyangiyn Amarsayxan rahbarlik qildi.

Tadbir moderatorlari sifatida O'zbekiston investitsiyalar, sanoat va savdo vazirining o'rinbosari Ilzat Kasimov va Mo'g'uliston Milliy savdo-sanoat palatasi Xalqaro hamkorlik departamenti direktori Solongo Enxsayxan ishtirok etdi.

Anjuman ishtirokchilariga murojaat qilar ekan, Jamshid Xodjayev so'nggi yillarda Yangi O'zbekistonda biznes muhiti va investitsiya jozibadorligini yaxshilash bo'yicha amalga oshirilgan keng ko'lamli islohotlarga e'tibor qaratdi. Natijada, mamlakat YIM ikki barobarga oshib, ilk bor 100 milliard AQSh dollaridan oshdi, 2024-yilda iqtisodiy o'sish sur'ati 6,5% ni tashkil etdi. Mamlakatga 70 milliard dollardan ortiq to'g'ridan-to'g'ri xorijiy investitsiyalar jalb qilindi.

O'zbekiston hukumatining xorijiy investorlarni to'liq qo'llab-quvvatlashga va qo'shma loyihalarni muvaffaqiyatli amalga oshirish uchun barcha shart-sharoitlarni yaratishga tayyor ekanligi yana bir bor tasdiqlandi.

O'zaro manfaatli hamkorlik uchun ustuvor yo'nalishlar belgilandi. Jumladan, savdo sohasida meva-sabzavot mahsulotlari, o'g'itlar, qurilish materiallari, farmatsevtika, maishiy texnika, to'qimachilik, poyabzal, go'sht, charm, jun mahsulotlari eksporti, savdo uylari va ko'rgazmalar tashkil etish kabi tashabbuslar ilgari surildi.

Ikkala davlat o'rtasidagi sanoat kooperatsiyasi charm, jun va kashemirni qayta ishlash, elektr jihozlari, mashinalar va qurilish materiallari ishlab chiqarish bo'yicha qo'shma korxonalarni tashkil etish orqali rivojlanadi.

Qishloq xo'jaligi va chorvachilik yo'nalishlarida issiqxonalar qurish, tomchilatib sug'orish texnologiyalarini joriy etish, hosilni saqlash va qayta ishlash bo'yicha loyihalar ilgari surildi.

Foydali qazilma konlarini qidirish va o'zlashtirish bo'yicha qo'shma loyihalar katta istiqbollarga ega ekani ta'kidlandi.

O'z navbatida, Mo'g'uliston Bosh vaziri o'rinbosari Saynbuyangiyn Amarsayxan O'zbekistonda yaratilgan qulay investitsiya muhitini yuqori baholab, Mongoliya tadbirkorlarini o'zbek hamkorlari bilan faol va dadil hamkorlik qilishga chaqirdi.

Anjuman yakunida jun, aralash matolar, to'qimachilik va charm mahsulotlarini O'zbekistonda ishlab chiqarishga oid qo'shma loyihalarni amalga oshirish bo'yicha ikki tomonlama hujjatlarni almashish marosimi bo'lib o'tdi.

Forum doirasida "Made in Uzbekistan" milliy mahsulotlari ko'rgazmasi ochildi, unda o'zbek ishlab chiqaruvchilarning mahsulotlari namoyish etildi. B2B va G2D uchrashuvlari o'tkazildi. Tadbirkorlar amaliy hamkorlik yo'nalishlarini muhokama qilib, keyingi hamkorlik uchun aniq qadamlarni belgilab olishdi.