QOHIRA, 20-sentyabr. /"Dunyo" AA/.  O'zbekiston elchixonasi ko'magida Yunus Rajabiy nomidagi O'zbek milliy musiqa san'ati instituti hamda Misr San'at akademiyasi va Arab musiqasi oliy instituti rahbariyati o'rtasida onlayn uchrashuv tashkil etildi, deb xabar qilmoqda "Dunyo" AA muxbiri.

Unda madaniyat va san'at sohasida O'zbekiston-Misr aloqalarini mustahkamlash, xususan ikki davlatdagi musiqa yo'nalishidagi ta'lim muassasalari o'rtasida hamkorlik o'rnatish masalalari ko'rib chiqildi.

Muzokaralar natijasida Yunus Rajabiy nomidagi O'zbek milliy musiqa san'ati instituti va Arab musiqasi oliy instituti o'rtasida Hamkorlik memorandumini imzolashga kelishib olindi.

Misr San'at akademiyasi 1959-yilda tashkil etilgan. Uning vazifalari san'at darajasini oshirish, xalq ijodi va folklor merosini asrab-avaylash hamda mintaqaviy va xalqaro madaniy aloqalarni rivojlantirishdan iborat. Akademiya Arab musiqasi oliy instituti, Musiqa oliy instituti, Teatr san'ati oliy instituti, Xalq san'ati oliy instituti, Kino oliy instituti, Balet oliy instituti, San'at tanqidi oliy institutini birlashtiradi.