SANKT-PETERBURG, 18-may. /"Dunyo" AA/. O'zbekiston Bosh konsulxonasi tomonidan Sankt-Peterburg davlat sanoat texnologiyalari va dizayn universitetida tahsil olayotgan vatandoshlar bilan birgalikda "Madaniy kod: O'zbekiston — har bir naqshda meros" nomli tadbir o'tkazildi, deb xabar qilmoqda "Dunyo" AA muxbiri.

Tadbir avvalida yosh dizaynerlar va ekspertlar jahon moda sanoatida asosiy o'rin tutadigan madaniy o'ziga xoslik va vizual kodlar masalalarini muhokama qildilar. So'zga chiqqanlar an'anaviy o'zbek naqshlaridan yangi estetik va ijodiy yondashuvlarni yaratishda qanday foydalanish mumkinligi haqida to'xtaldi.

Milliy o'zbek ikat matosini zamonaviy dizaynga singdirishga ixtisoslashgan yetakchi dizaynerlardan biri Mohinur Komolovaning dizaynerlik kolleksiyasi namoyishi dasturning muhim qismi bo'ldi.

Umuman olganda, tadbir ishtirokchilari O'zbekistonga xos bo'lgan mato va naqshlarning madaniy xususiyatlari va tarixiy ahamiyati, globallashib borayotgan dunyoda milliy o'zlikni saqlashning ahamiyati haqida ko'proq ma'lumot olish imkoniga ega bo'ldilar.

Tadbir boy dastur va betakror muhit bilan ajralib turdi. Sahna ham an'anaviy o'zbek madaniyati ruhida bezatilgan bo'lib, bu qadimiy naqshlar olami bilan tanishishning o'ziga xos muhitini yaratdi.

O'zbekiston dekorativ-amaliy san'ati ustalari o'z bilimlari bilan o'rtoqlashdilar. Shuningdek, ishtirokchilar uchun milliy o'zbek an'analari bilan tanishish va matolarga bezak elementlarini yaratish bo'yicha interfaol maydon yaratildi.