STOKGOLM, 11-iyul. /"Dunyo" AA/. Shvetsiyaning "Sava Media" nodavlat axborot agentligi "Turkiy davlatlar xalqaro savdoni o'zgartirmoqda va kelajakka investitsiya kiritmoqda" sarlavhali maqolani tarqatdi, deb xabar qilmoqda "Dunyo" AA muxbiri.

"Turkiya, Ozarbayjon, Qozog'iston, Qirg'iziston, O'zbekiston va Turkmanistonni birlashtirgan Turkiy davlatlar tashkiloti (TDT) global masalalarda muhim tuzilma hisoblanadi, – deyiladi maqolada. – O'xshash til, madaniy va tarixiy aloqalar bilan birlashgan bu mamlakatlar geografik yaqinlik doirasidan tashqariga chiqadigan hamkorlikni tashkil qiladi. Hamkorlik chuqurlashib borar ekan, turkiy davlatlar global xavfsizlik va iqtisodiy manzarani tobora shakllantirmoqda, xalqaro kuzatuvchilar, ayniqsa, Yevropa va Osiyo davlatlari diqqatini jalb qilmoqda".

Nashrda turkiy xalqlarning umumiy merosi ming yilliklar davomida madaniy va iqtisodiy almashinuvga xizmat qilgan qadimgi Ipak yo'li davriga borib taqalishi urg'ulangan. Bugungi kunda bu tarixiy zamin zamonaviy tashabbuslar uchun asos bo'lib xizmat qilmoqda. TDT va Xalqaro Turkiy akademiya a'zo mamlakatlar o'rtasida muloqot, madaniy almashinuv va strategik sheriklik munosabatlarini rivojlantirish uchun zamonaviy platforma hisoblanadi.

"Turkiy davlatlarning iqtisodiy strategiyasining o'zagini "O'rta yo'lak" deb nomlanuvchi Transkaspiy xalqaro transport yo'nalishi tashkil etadi. "O'rta yo'lak" an'anaviy transport yo'nalishlariga tahdid solayotgan geosiyosiy beqarorlik tufayli muhim ahamiyat kasb etmoqda", – deya qayd etilgan materialda.

Turkiy davlatlar transport sohasidan tashqari energetika va texnologiya sohalarida ham hamkorlikni chuqurlashtirmoqda, deb ma'lum qilgan agentlik. Shuningdek, turkiy davlatlar ham kelajakni ko'zlab, tadqiqot, ta'lim va "raqamli" infratuzilmaga investitsiya kirityapti.

Materialda ta'kidlanishicha, ushbu tuzilmaga a'zo davlatlar global e'tiborni jalb qilish maqsadida madaniy tashabbuslarni moliyalashtirishga ham katta e'tibor qaratyapti.

Turkiy dunyo tarixning hal qiluvchi pallasini boshdan kechirmoqda. O'zlarining umumiy merosi, strategik joylashuvi va hamkorlik ruhidan foydalangan holda, bu davlatlar global savdo va geosiyosatni qayta shakllantirishda asosiy ishtirokchiga aylanishga tayyor. Infratuzilma, texnologiya va madaniy almashinuvga sarmoya kiritishda davom etib, bu davlatlar XXI asr uchun yangi Ipak yo'lini yaratmoqda.

"Turkiy xalqlar o'zlarining qadimiy va boy tarixining navbatdagi bobini yozayotganini dunyo diqqat bilan kuzatishi kerak. Ularning o'sib borayotgan ta'siri kelgusi o'n yilliklarda global biznesdagi eng muhim va o'zgaruvchan o'zgarishlardan biriga aylanishi mumkin", – deb yozilgan "Sava Media" maqolasida.