TOSHKENT, 7-iyun. /"Dunyo" AA/. Futbol assotsiatsiyalari xalqaro federatsiyasi (FIFA) rahbari Janni Infantino O'zbekiston Prezidenti Shavkat Mirziyoyevga maktub yo'lladi, deb xabar qilmoqda "Dunyo" AA muxbiri davlatimiz rahbarining matbuot kotibi Sherzod Asadovning telegram-kanalidagi ma'lumotga tayanib.

"Kecha O'zbekiston o'z tarixida ilk bor FIFA Jahon chempionatiga chiqib, Osiyoda birinchi bo'lib JCh-2026 yo'llanmasini qo'lga kiritgan terma jamoalardan biriga aylandi, – deyiladi maktubda. – Butun futbol jamoatchiligi nomidan Sizni va butun O'zbekiston xalqini ushbu munosib va tarixiy natija bilan tabriklashga ijozat bergaysiz.

Bunday ajoyib yutuq ushbu muvaffaqiyatga aloqador bo'lgan barchaning birgalikdagi sa'y-harakatlari va qat'iy irodasi tufayli amalga oshdi. Sizga, hukumatingizga, O'zbekiston futbol assotsiatsiyasiga, futbolchilarga, murabbiyga, barcha xodim va rahbarlarga, shuningdek, albatta, qalbi qaynoq muxlislarga samimiy tabriklarimni yo'llayman.

Muhtaram Prezident, Sizga 2026-yilgi FIFA Jahon chempionatida muvaffaqiyatlar tilayman hamda Siz, Janobi Oliylari bilan yana bir bor uchrashish imkoniyatini intiqlik bilan kutaman".

O'zbekiston Prezidenti matbuot xizmati arxividan olingan surat