OQTOV, 19-mart. /"Dunyo" AA/. O'zbekiston Bosh konsulligi xodimlari Oqtov shahridagi "Ilon Tower" turar-joy majmuasi qurilish ishlarida vaqtincha ishlayotgan vatandoshlar bilan uchrashuv o'tkazdilar, deb xabar qilmoqda "Dunyo" AA muxbiri.

Muloqot avvalida diplomatlar yurtdoshlarimizni muqaddas Ramazon oyi kirib kelishi va Navro'z umumxalq bayrami bilan tabriklashdi.

Ishtirokchilarga O'zbekistonda amalga oshirilayotgan o'zgarishlar, hukumat tomonidan xorijda vaqtincha mehnat faoliyatini olib borayotgan fuqarolarimizni ijtimoiy va huquqiy qo'llab-quvvatlash borasida olib borilayotgan ishlar xususida batafsil ma'lumot berildi.

Vatandoshlarga mezbon davlat qonun-qoidalariga rioya etish zarurligi ta'kidlandi. Shuningdek, migratsiya sohasidagi yangi talablar haqida aytib o'tildi.

Bo'lib o'tgan muloqot so'ngida mehnat migrantlari o'zlarini qiziqtirgan savollarga diplomatlardan batafsil javob olishdi.