SEUL, 19-yanvar. /"Dunyo" AA/. Koreya Respublikasida bo'sh ish o'rinlariga belgilangan kvotalar uchun o'zbekistonlik ishchilarni ko'proq kirib kelishini ta'minlash maqsadida koreys ish beruvchilari o'rtasida keng targ'ibot ishlari olib borilmoqda, deb xabar bermoqda "Dunyo" AA muxbiri.

Xususan, Tashqi mehnat migratsiyasi agentligining Kvangju shahridagi vakolatxonasi xodimlari «Heechang C&F Co., Ltd.» korxonasi boshqaruv direktori Kang Hi Daye bilan uchrashuv o'tkazdilar.

Unda mehnat migratsiyasi sohasida hamkorlik masalalari yuzasidan muzokaralar olib borildi.

Kompaniya rahbari tashkilotda mehnat qilayotgan O'zbekiston fuqarolarining korxona ish samaradorligiga munosib hissa qo'shayotganini, mehnat munosabatlarida intizomli hamda ishga mas'uliyat bilan yondashuvi kabi ijobiy xislatlari bilan ajralib turishini e'tirof etdi.

Muloqot yakunida kelgusida mazkur korxonadagi bo'sh ish o'rinlariga o'zbekistonlik ishchilarni jalb qilishga kelishib olindi.