ANQARA, 29-sentyabr. /"Dunyo" AA/. O'zbekiston elchixonasi ko'magida Turkiya Tashqi iqtisodiy aloqalar kengashi va Andijon viloyati hokimligi vakillari ishtirokida vebinar tashkil etildi, deb xabar qilmoqda "Dunyo" AA muxbiri.

Vebinarda ikki mamlakat elchilari, Tashqi iqtisodiy aloqalar kengashining Turkiya-O'zbekiston qo'mitasi raisi O'zg'ur Onur O'zguven, Andijon viloyati hokimligi mutasaddilari va viloyatida faoliyat olib borayotgan turk investorlari ishtirok etdi.

Andijon viloyatining savdo-iqtisodiy, investitsiyaviy, avtomobilsozlik, to'qimachilik, qishloq xo'jaligi va oziq-ovqat sanoati, uy-joy qurilishi va qurilish materiallari sohalaridagi salohiyati hamda hududda yangi tashkil etilgan erkin iqtisodiy zonalar haqida taqdimotlar o'tkazildi.

Andijon viloyatida ishlayotgan "MASIS TEKS" qo'shma korxonasi bosh direktori Yilmaz Sosyal, "OZDEMIR KIMYA" xorijiy korxonasi ta'sischisi Zeki O'zdemir o'z faoliyatlari va tajribalari bilan o'rtoqlashdi.

Vebinar yakunida Turkiyalik yirik ishbilarmon doira vakillarining O'zbekistonga, xususan, Andijon viloyatiga, o'z o'rnida andijonlik tadbirkorlarning Turkiyaga biznes-missiyalarini tashkil qilishga kelishib olindi.