TEL-AVIV, 5-may. /"Dunyo"AA/. "Air Samarkand" aiakompaniyasi Samarqand va Tel-Aviv yo'nalishidagi ilk to'g'ridan-to'g'ridan havo qatnovlarini amalga oshirdi, deb xabar bermoqda "Dunyo" AA muxbiri.

Shu tariqa, "Air Samarkand" Isroilga parvozlarni amalga oshirayotgan to'rtinchi O'zbekiston aviakompaniyasiga aylandi. Jumladan, ushbu yo'nalishda "Uzbekistan Airways", "Qanot Sharq" va "Centrum Air" kompaniyalari o'z qatnovlarini amalga oshiradi.

Tel-Avivdagi "Ben-Gurion" aeroportida mazkur yo'nalishda parvoz qilgan yo'lovchilarni kutib olish marosimi bo'lib o'tdi. Tadbirda "Air Samarkand" aviakompaniyasining Isroildagi vakili va "Asia Travel" turistik kompaniyasi asoschisi Nissan Mushayev so'zga chiqdi.

 "Ushbu yangi aviaqatnov fuqarolarga qulaylik yaratish bilan birga, ikki mamlakat o'rtasidagi turli yo'nalishlardagi aloqalarni kengaytirishga xizmat qiladi. Samarqand endi Isroilga yana-da yaqin bo'ladi", dedi u.

 "Air Samarkand" aviakompaniyasi mazkur yo'nalishda qatnovlarni dastlabki bosqichda haftada bir marta – har yakshanba kunlari amalga oshiradi. Shu yilning 10 iyul sanasidan boshlab esa har payshanba kuni qo'shimcha reys yo'lga qo'yilishi rejalashtirilmoqda.

Tantanali marosim va "Air Samarkand" parvozining amalga oshirilishi Isroilning qator ommaviy axborot vositalarida keng yoritildi. Mahalliy media bu voqeani O'zbekiston va Isroil o'rtasidagi turizm, iqtisodiy hamkorlik va xalqlarimiz o'rtasidagi aloqalarni mustahkamlashdagi navbatdagi muhim qadam sifatida baholamoqda.