LONDON, 9-sentabr. /"Dunyo" AA/. O'zbekiston elchisi Ravshan Usmanov London Savdo-sanoat palatasi prezidenti Maykl Maynelli va "Fitch Ratings" agentligining suveren va xalqaro tashkilotlar reytingi bo'yicha boshqaruvchi direktori Jeyms Longsdon bilan muzokaralar o'tkazdi, deb xabar qilmoqda "Dunyo" AA muxbiri.

Britaniya vakillari, muloqot avvalida mamlakatimizda amalga oshirilayotgan islohotlar natijasini va ikki tomonlama munosabatlarning bugungi holatini yuksak baholadi. 

Maykl Maynellining aytishicha, London Savdo-sanoat palatasiga 1881-yilda asos solingan. Mazkur tashkilot a'zo kompaniyalarga trening, bozor ma'lumotlari, xalqaro savdo hujjatlari, arbitraj va hamkorlik imkoniyatlarini o'z ichiga olgan biznes xizmatlarini ko'rsatadi.

 Uchrashuvda London Savdo-sanoat palatasi va O'zbekiston Savdo-sanoat palatasi hamda mamlakatimiz kompaniyalari o'rtasida hamkorlik o'rnatish taklifi bildirildi.

Shuningdek, O'zbekistonning suveren kredit reytingini yana-da yaxshilash istiqbollari xususida fikr almashildi. "Fitch" tomonidan O'zbekiston suveren reytingining oshirilishi respublikada olib borilayotgan tub islohotlarning xalqaro maydondagi e'tirofi ekanligi ta'kidlandi.