VARSHAVA, 7-dekabr. /"Dunyo" AA/. O'zbekistonning Polshadagi elchisi Amirsaid A'zamxo'jayev Ruminiya Tashqi ishlar vazirligi davlat kotibi Ana Tinkaga Ruminiyadagi Favqulodda va Muxtor Elchi sifatidagi ishonch yorliqlari nusxalarini topshirdi, deb xabar bermoqda "Dunyo" AA muxbiri.

Ruminiya protokoliga ko'ra, ishonch yorliqlari nusxalarini topshirish marosimi videokonferensiya shaklida bo'lib o'tdi.

Onlayn muloqot chog'ida Ana Tinka ikki tomonlama munosabatlar yuksak darajada ekanini alohida ta'kidladi va yaqinda Buxarestda bo'lib o'tgan O'zbekiston-Ruminiya siyosiy maslahatlashuvlarining navbatdagi davrasining muvaffaqiyatlarini qayd etdi. O'zbekistonda amalga oshirilayotgan islohotlar qo'llab-quvvatlanib, siyosiy muloqotni mustahkamlash, parlamentlararo aloqalarni faollashtirish muhimligi ta'kidlandi.

Tomonlar iqtisodiy va investitsiyaviy hamkorlikni rivojlantirish istiqbollarini muhokama qildilar hamda hududlararo aloqalarni yo'lga qo'yish muhimligini qayd etdilar.

Uchrashuv yakunlari bo'yicha 2025-yilda turli darajadagi tashriflar, jumladan, hukumatlararo kengashlar majlislarini o'tkazish yuzasidan kelishuvlarga erishildi.

Eslatib o'tamiz, Amirsaid A'zamxo'jayev Varshavaga 2023-yilning noyabr oyida tashrif buyurib, O'zbekistonning Polshadagi elchisi sifatida o'z faoliyatini boshlagan edi. U shu paytga qadar TIVning Konsullik-huquqiy departamentida, O'zbekistonning Istanbul shahridagi Bosh konsulxonasi konsuli bo'lib ishlagan, 2020-yildan beri esa Bosh konsulxonaga rahbarlik qilgan.