O'MON, 14-iyun. /"Dunyo AA/. Mamlakatimizning O'mondagi elchisi Abdusalom Xatamov O'mon Boshqaruv akademiyasi prezidenti Ali bin Qosim al-Lavatiy bilan uchrashuv o'tkazdi, deb xabar qilmoqda "Dunyo" AA muxbiri.

Muloqot chog'ida O'mon Boshqaruv akademiyasi va O'zbekiston Prezidenti huzuridagi Davlat siyosati va boshqaruvi akademiyasi o'rtasida akademik aloqalarini o'rnatish, o'zaro tajriba almashish hamda tashriflar uyushtirish masalalari muhokama qilindi.

Shuningdek, Sultonlik Boshqaruv akademiyasi rahbariyati joriy yilning 23-25-iyun kunlari Samarqandda bo'lib o'tadigan Davlat xizmati bo'yicha BMT forumida ishtirok etishini ma'lum qildi.

O'mon Boshqaruv akademiyasi 2022-yilda amaldagi mamlakat Sultoni Haysam bin Toriq tomonidan ta'sis etilgan. Akademiya Sultonlik davlat boshqaruvida malakali kadrlarni tayyorlash, davlat boshqaruvidagi mas'ullarning malakasini oshirish, zamonaviy tahdidlarni o'rganish va ularga yechim topa oladigan mahoratli rahbarlarni yetishtiradi.