ЛОНДОН, 23 декабрь. /"Дунё" АА/. Ўзбекистон элчихонаси кўмагида юртимизда етиштирилган қишлоқ хўжалиги маҳсулотларини Буюк Британияга экспорт қилиш тартибларига бағишланган онлайн тренинг ташкил этилди, деб хабар бермоқда "Дунё" АА мухбири.

Унда Ўзбекистон вилоятлари ҳокимликларининг экспортга масъул бўлган бўлинмалари, Ўсимликлар карантини ва ҳимояси агентлиги масъуллари ҳамда етакчи экспортёрлар иштирок этди.

Иштирокчиларга Британияга экспорт қилиш жараёнида тариф ва нотариф тўсиқларни енгиб ўтиш, товарларни ўраш, қадоқлаш, белгилаш (маркировка), сертификатлаштириш, ҳаво ва автомобиль транспорти билан ташиш ва бошқа талаблар тўғрисида батафсил маълумот берилди.

Таъкидлаб ўтиш керакки, 2024 йил январь-ноябрь ойларида Ўзбекистондан Британияга экспорт ҳажми 2023 йилнинг шу даврига нисбаттан 105 фоизга ошди ва 133,6 миллион АҚШ долларини ташкил этди. Жорий йилда илк бор экспорт кўрсаткичларининг ўсиши ва импортнинг камайиши кузатилди. Ҳозирги кунда Ўзбекистон корхоналари томонидан 30 хил турдаги маҳсулотлар Буюк Британияга экспорт қилинмоқда.