ВАШИНГТОН-ТЕҲРОН, 24 июль. /“Дунё” АА/. АҚШ Президенти Дональд Трамп Эронга қарши аввалгиларидан кўра йирик кўламдаги янги ҳарбий амалиёт бошлаш имкониятини кўриб чиқаётганини билдирди, деб хабар беради “Дунё” АА мухбири.

Оқ уй раҳбарининг сўзларига кўра, якуний қарор ҳали қабул қилинмаган, бироқ Америка ҳарбийлари бундай сценарийни амалга оширишга тайёр.

“Мен оммавий ҳужум уюштириш имкониятини кўриб чиқяпман. Ҳар қачонгидан ҳам кенгроқ кўламда. Қарор қабул қилиш арафасидаман. Биз тўлиқ тайёрмиз”, – деди Дональд Трамп “Axios” нашрига берган интервьюсида.

Бироқ, Американинг юқори мартабали манбалари янги амалиётни бошлаш тўғрисида ҳали буйруқ берилмаганини билдирди.

Шунингдек, АҚШ Президенти Исроил эҳтимолий амалиётга зудлик билан қўшилишга тайёрлигини айтди.

“Агар сўрасам, улар икки дақиқада қўшилади. Лекин бизга ҳеч ким керак эмас”, – деди у ва Исроилнинг иштироки жиддий оқибатларга олиб келиши мумкинлигини таъкидлаб, Эроннинг жавоб зарбаси эҳтимолига ишора қилди.

Дональд Трампнинг фикрича, Теҳрон ҳамон музокаралардан манфаатдор, бироқ ҳозирча муросага тайёр эмас. “Улар ҳали етарлича жабр кўрмади”, – деди Дональд Трамп.

Воситачилик ҳаракатларидан хабардор манбалар Эрон раҳбарияти сўнгги таклифни рад этганини маълум қилди.

Президентнинг баёнотлари можаро авж олаётган бир пайтда янгради. АҚШ қуролли кучлари кетма-кет 13-кечадан буён Эроннинг ҳарбий объектларига зарба бермоқда. АҚШ Марказий қўмондонлиги маълумотларига кўра, сўнгги ҳужумлар Ислом инқилоби посбонлари корпуси объектлари, Ҳўрмуз бўғозидаги Қешм оролидаги ҳарбий-денгиз базаси ҳамда Исфаҳон, Хузистон ва Форс вилоятларидаги нишонларга қаратилган.

Бунга жавобан, Эрон зарбалар географиясини кенгайтирмоқда. Бугун Ироқ шимолидаги Эрбил шаҳрида жойлашган Америка ҳарбий базаси яқинида бир қатор портлашлар содир бўлди, Баҳрайнда эса икки марта ҳаво ҳужумидан огоҳлантириш эълон қилинди. Шунингдек, Теҳрон Иордания ва Қувайтдаги Америка ҳарбий объектларига зарба берганини маълум қилди.

“Al Arabiya” ахборот порталининг хабар беришича, Франция ва Буюк Британия можаро кескинлашуви фонида кучайиб бораётган хавотирлар сабабли Эрондаги дипломатик ходимларини чақириб олган.

Яманда Эрон томонидан қўллаб-қувватланадиган, Саудия Арабистонига денгиз блокадаси эълон қилган ва Қизил денгизда мамлакатнинг иккита нефть танкерига ҳужум қилган Ҳусийлар ҳаракатининг хатти-ҳаракатлари кескинликни янада кучайтирмоқда. Шундан сўнг, Дональд Трамп ҳужумлар такрорланса, АҚШ Ҳусийларнинг ҳаракатлари учун Эронни жавобгар деб билишини огоҳлантирди.

“Агар улар буни яна такрорласа, АҚШ масъулиятни Эронга юклайди, чунки Ҳусийлар унинг ишончли вакилларидир. Ва Эрон ҳам, Ҳусийларнинг ўзлари каби, жиддий ҳарбий жазога тортилади”, – деб ёзди АҚШ президенти “Truth Social” ижтимоий тармоғида.

Уммон “Хавфсизлик ва барқарорликка қаратилган сиёсий йўналишни қайта тиклаш” учун Саудия Арабистони, Яман томонлари ва БМТнинг Яман бўйича махсус элчиси билан ўз ҳаракатларини мувофиқлаштираётганини маълум қилди.

Кема қатнови компаниялари Қизил денгиз ва Боб-ал-Мандаб бўғозини четлаб ўтиб, ўз йўналишларини ўзгартира бошлади. Шу билан бирга, Ҳўрмуз бўғози орқали ўтаётган танкерлар сони сўнгги ойлардаги энг паст даражага тушди.

Эрон Соғлиқни сақлаш вазирлиги маълумотларига кўра, сўнгги ҳафталарда зарбалар оқибатида камида 55 киши ҳалок бўлган, 600 дан ортиқ киши жароҳатланган. Давом этаётган воситачилик саъй-ҳаракатларига қарамай, можарони тез орада ҳал қилиш аломатлари ҳозирча кузатилмаяпти.