ВАШИНГТОН, 10 июнь. /“Дунё” АА/. АҚШ Вакиллар палатаси мамлакатнинг миграция ва чегара хизматлари фаолиятини молиялаштириш учун 70 миллиард доллар ажратиш тўғрисидаги қонун лойиҳасини қабул қилди, деб хабар бермоқда “Дунё” АА мухбири “NBC News”га таяниб.

Демократлар партияси вакилларининг танқидларига қарамасдан, ушбу ташаббусни 214 нафар қонунчи қўллаб-қувватлади, 212 нафари эса қарши овоз берди. Аввалроқ қонун лойиҳаси Сенатда ҳам маъқулланган эди, энди уни АҚШ Президенти имзолаши керак.

Қонун лойиҳаси Иммиграция ва божхона назорати (ICE) ҳамда Божхона ва чегара муҳофазаси (CBP) хизматлари фаолиятини молиялаштиришни назарда тутади. Бу сумма уч йилга – Дональд Трампнинг президентлик муддати якунигача мўлжалланган.

Таъкидлаш жоизки, таркибига ICE ва CBP кирувчи АҚШ Миллий хавфсизлик вазирлигини молиялаштириш 2026 йил февраль ойида Миннесота штатининг Миннеаполис шаҳрида муҳожирларга қарши ўтказилган рейдлар ортидан тўхтатиб қўйилган эди. Ўшанда ICE агентлари икки нафар АҚШ фуқаросини отиб ўлдирган. Иккала ҳолатда ҳам отишма ўзини ҳимоя қилиш мақсадида амалга оширилгани даъво қилинган, бироқ кейинроқ эълон қилинган видеоёзувлар воқеаларнинг бундай талқин қилинишига шубҳа уйғотган.

Миннеаполисда ICE агентлари ҳаракатлари атрофида юзага келган можаро мамлакат маъмуриятида қатъий иммиграция сиёсатини олиб борган Миллий хавфсизлик вазири Кристи Ноэмнинг истеъфосига сабаб бўлди. Унинг ўрнини республикачи сенатор Маркуэйн Маллин эгаллади.

“PBS” порталидан олинган сурат