ВАШИНГТОН, 19 сентябрь. /"Дунё" АА/. АҚШ Давлат департаменти биринчи марта ҳар бир грин-карт лотереяси иштирокчиси учун 1 доллар миқдорида рўйхатдан ўтиш йиғимини жорий қилди, деб хабар бермоқда "Дунё" АА мухбири.

АҚШ ҳукуматининг Федерал реестри маълумотига кўра, янги тартиб октябрь ойида очиладиган "DV 2027" (грин-карта) учун рўйхатдан ўтиш доирасида кучга киради.

Бугунги кунгача мазкур харажат учун тўлов лотерея натижалари бўйича танлаб олинган иштирокчилар томонидан яшаш учун рухсатнома олишга ариза топширишда тўланадиган 330 долларлик йиғим доирасида амалга оширилган. Янги йиғимнинг жорий этилиши ҳар йили қўшимча 25 миллион долларгача маблағ ишлаб топиш имконини бериши кутилмоқда.

Қайд этилишича, маблағлар аризаларни йиғиш тизимларини ишлатиш, маълумотларни сақлаш, ғолибларни автоматик танлаш, шунингдек, хавфсизлик текширувларини таъминлашга йўналтирилади. Шу билан бирга, департамент тўлов жорий этилгандан сўнг аризалар сони камайиши мумкинлигини инкор этмаган.

АҚШ Давлат департаменти ҳар йили 50 минг грин-карт эълон қилади. Ўйин тасодифий ўтказилади, аммо ғалаба қозонганингиздан сўнг сиздан "DS-260" иммиграция анкетасини тўлдиришингиз ҳамда суҳбат ва тиббий кўрикдан ўтишингиз талаб қилинади.

Эслатиб ўтамиз, бу йил Ўзбекистондан 5564 нафар киши грин-карт ютди ва биринчи ўринни эгаллади. Ўтган йили АҚШда 12,8 миллион киши грин-карт ва 3,6 миллион киши вақтинчалик виза билан рўйхатга олинган.