ФРАНКФУРТ-МАЙН, 30 октябрь. /«Дунё» АА/. «Uzbekistan Airways» авиакомпанияси 29 октябрь кунидан бошлаб Тошкент–Мюнхен–Тошкент йўналишида тўғридан-тўғри ҳаво қатновларини йўлга қўйди, деб хабар бермоқда «Дунё» АА мухбири.

Йўналиш бўйича парвозлар ҳафтасига икки марта - жума ва якшанба кунлари амалга оширилади.

Ўзбекистон ва Германиянинг йирик шаҳарлари ўртасида тўғридан-тўғри авиақатновларнинг йўлга қўйилиши икки мамлакат мулоқотини барча соҳаларда янада фаоллаштириш ва кўп қиррали ҳамкорликни ривожлантириш имконини бериши таъкидланди. Хусусан, мамлакатларимиз ўртасида мунтазам авиақатновлар очилиши натижасида туризм, маданий-гуманитар алмашинув ва савдо-иқтисодий ҳамкорлик каби муҳим йўналишларда яқин алоқалар ўрнатилади.

Расмий очилиш маросими доирасида Ўзбекистон бош консули Олимжон Абдуллаев ва Мюнхен аэропорти вице-президенти Ульрих Теис ўртасида музокаралар бўлиб ўтди. Авиакомпания йўловчиларига хизмат кўрсатиш сифатини ошириш ва тегишли шарт-шароитлар яратиш бўйича келишувга эришилди.

Эслатиб ўтамиз, 1993 йилдан буён Тошкентдан Франкфурт-Майн йўналиши бўйича  ҳаво қатновлари душанба, пайшанба ва шанба кунлари мунтазам равишда амалга ошириб келинмоқда. Бу мамлакатларимиз ўртасидаги иқтисодий ва сайёҳлик алоқаларини мустаҳкамлашга хизмат қилмоқда.