ДЕҲЛИ. 22 май. /“Дунё” АА/ Ҳиндистоннинг Колката шаҳридаги “Hindistan International” конгресс марказида таниқли ўзбек шоираси Хосият Рустамнинг бенгал тилидаги “Кўнгилга чўккан ҳилол” китоби тақдимоти бўлиб ўтди, деб хабар бермоқда “Дунё” АА мухбири.

Тадбирда Ғарбий бенгалиялик адабиётшунослар, таржимонлар, ёзувчилар, шоирлар, китобхонлар ҳамда санъаткорлар иштирок этди.

Ҳинд ёзувчиси Сайкат Ракшит, актёр ва эссеист Анирбан Бҳаттачаря ва бошқа ҳинд зиёлилари Хосият Рустам шеъриятида инсон психологиясининг теран очилганини, умуминсоний ғояларнинг юксак жаранглашини, ҳаёт фалсафасининг оригинал бадиий талқинини қайд этди.

Шоира шеърларининг бенгал китобхонлари руҳиятига яқинлиги алоҳида таъкидланди.

Тақдимот маросимида муаллиф Рабиндранат Тагор ижоди ва адабиётнинг чегараларни енгиб ўтадиган сўнмас кучи ҳақида фикр юритди.

“Кўнгилга чўккан ҳилол” китобининг тақдимоти ўзбек-ҳинд адабий алоқаларини янада мустаҳкамлаш ва замонавий ўзбек шеъриятини халқаро майдонда оммалаштиришга хизмат қилади.

Ушбу китоб муаллифнинг хорижда чоп этилган йигирма тўққизинчи асари бўлди. Бунгача Хосият Рустамнинг асарлари Англия, АҚШ, Россия, Вьетнам, Греция, Беларусь, Озарбайжон, Саудия Арабистони, Туркия, Руминия, Украина, Сербия, Тожикистон, Қозоғистон ва бошқа давлатларда нашр этилган.