ВАРШАВА, 22 май. /“Дунё” АА/. Польшанинг “Rohlig SUUS” логистика оператори Ўзбекистонда ўз компаниясини очиш ниятида, деб хабар бермоқда “Дунё” АА мухбири “Puls Biznesu” нашрига таяниб.

Таъкидланишича, Марказий Осиё мамлакатлари Польша бизнеси, менежерлари ва сармоявий тузилмалари учун тобора жозибадор бўлиб бормоқда. Хусусан, “PKO BP”нинг собиқ раҳбари Рафаль Юшчак Ўзбекистондаги “Hamkor Bank”ка раислик қила бошлади, “Selena” компанияси эса республикада ҳам, минтақанинг бошқа давлатларида ҳам ўз сармоявий фаолиятини кенгайтиришда давом этмоқда.

Шунингдек, Польшанинг “Rohlig SUUS Logistics” логистика оператори Марказий Осиёда ўз фаолиятини фаол кенгайтирмоқда. Аввалроқ Қозоғистон бозорига кирган компания айни пайтда Ўзбекистонда ўз шўба корхонасини очмоқда ва бу мамлакат гуруҳ фаолият юритадиган тўққизинчи давлатга айланади.

Компания президенти Пётр Иво Хмелевскийнинг қайд этишича, минтақадаги фаолиятнинг кенгайиши кучайиб бораётган геосиёсий беқарорлик шароитида глобал логистика бозоридаги мавқени мустаҳкамлаш имконини беради. Унинг сўзларига кўра, Марказий Осиё сармоялар учун “хавфсиз бандаргоҳ” сифатида кўрилмоқда, Тошкентнинг танланишига эса унинг юксалиб бораётган иқтисодий аҳамияти сабаб бўлган. Шунингдек, у Ўзбекистоннинг ривожланиши кўп жиҳатдан 1990 йиллардаги Марказий Европада кечган трансформация жараёнларини эслатишини қўшимча қилди.

“Компаниянинг Ўзбекистонда фаолият юритиши маҳаллий ўзига хосликларни тушунадиган ишончли ҳамкор излаётган халқаро компаниялар учун ҳам, хорижий сармоядорлар билан ҳамкорлик қилишни мақсад қилган маҳаллий бизнес манфаатлари учун ҳам бирдек фойдалидир”, - дейди Пётр Иво Хмелевский.

Ўз навбатида, “LOT” авиакомпаниясининг йўналишлар тармоғи кенгайиб бораётгани минтақада Польша бизнесининг ривожланишига ҳисса қўшмоқда. Компания вакили Кшиштоф Мочульскийнинг, қайд этишича, Қозоғистон, Ўзбекистон ва минтақанинг бошқа мамлакатларида тобора кўпроқ компаниялар ўз фаолиятини кучайтирмоқда, бу эса Марказий Осиёнинг Польша ва Европа бизнеси учун аҳамияти ортиб бораётганидан далолат беради.