ТОШКЕНТ, 12 ноябрь. /"Дунё" АА/. Тошкент халқаро аэропорти учиб келиш залида "E-Gate" автоматлаштирилган паспорт назорати тизими жорий этилди, деб хабар бермоқда "Дунё" АА мухбири "Uzbekistan Airports" telegram-каналига таяниб.

Янги ўтиш жойлари Ўзбекистон фуқаролари учун мўлжалланган 8 та электрон йўлак билан жиҳозланган. Йўловчилар биометрик паспортларини махсус сканерга қўядилар ва шахсни тасдиқлаш жараёнидан ўтадилар. Шундан сўнг, турникет автоматик равишда очилади. Бутун жараён тахминан 15-20 сония давом этади.

"E-Gate" тизими илк бор 2023 йилда Тошкент аэропортида - халқаро терминалнинг парвозлар залида ишга туширилган эди. Ҳозирда пойтахт аэропортида мазкур янги ўтиш жойи билан бирга автоматлаштирилган ўтказиш линияларининг умумий сони 20 тага етди.

Таъкидлаш жоизки, "E-Gate" технологиясининг жорий этилиши паспорт назорати вақтини сезиларли даражада қисқартиради, назорат пунктларининг ўтказувчанлигини оширади ва йўловчилар учун қўшимча қулайлик яратади.