НЬЮ-ЙОРК, 13 ноябрь. /“Дунё” АА/. Нью-Йоркнинг Бруклин туманида турар-жой биноси қулаши оқибатида саккиз киши ҳалок бўлиб, 18 киши жароҳатланди, деб хабар бермоқда “Дунё” АА мухбири “The New York Times” нашрига таяниб.

Ўпирилиш чоршанба куни маҳаллий вақт билан соат 16:00 атрофида содир бўлган. Ҳалок бўлганлар орасида икки нафар бола, икки нафар қурилиш ишчиси ва икки нафар Эквадор фуқароси бор. Яна икки нафар киши шифохонада вафот этган. Жабрланганларнинг тўрт нафари қутқарув операциясида иштирок этган ўт ўчирувчилар бўлган.

Шаҳар ҳокимияти маълумотларига кўра, турар-жой биноси 1930 йилда қурилган ва тўртта хонадондан иборат бўлган. Хавфсизлик мақсадида ушбу кўчадаги яна учта уй аҳолиси техник текширувлар якунлангунига қадар вақтинча эвакуация қилинди.

Нью-Йорк мери Зоҳран Мамдани қулаган бино яқинидаги қурилиш майдонига алоқадор бешта компания ҳамда ушбу ташкилотларга алоқадор яна 100 га яқин объект текширилишини эълон қилди.

Дастлабки маълумотларга кўра, қўшни қурилиш майдонида йил бошидан буён ер ишлари, жумладан, қояларни майдалаш бўйича портлатиш ишлари олиб борилган.

Қутқарув операцияси кучли ёмғир шароитида қарийб бир кеча-кундуз давом этди. Унда 250 нафарга яқин мутахассис ва фавқулодда хизматлар ходимлари иштирок этди. Кеча ўт ўчириш хизмати қидирув ишлари якунлангани ва вайроналар остида бошқа жабрланганлар топилмаганини маълум қилди.

Зоҳран Мамданийнинг айтишича, шаҳар ҳокимияти фожиа сабабларини аниқлаш ва айби исботланган шахсларни жавобгарликка тортиш ниятида.

 “Reuters” агентлиги сурати