ҚОҲИРА, 22 апрель. /"Дунё" АА/. Жиззах вилоятига хорижий инвестициялар оқимини кўпайтириш, экспорт ҳажмини кўпайтириш ва манфаатли лойиҳаларни амалга ошириш доирасида жорий йилнинг 23-24 апрель кунлари Зомин туманида ўтказиладиган "Жиззах – 2025" халқаро бизнес-форумида иштирок этиш учун мисрлик тадбиркорлар билан яқиндан музокаралар олиб борилди, деб хабар қиляпти "Дунё" АА мухбири.

Музокаралар натижасида бир гуруҳ етакчи мисрлик тадбиркорлар "Жиззах – 2025" халқаро бизнес-форумида иштирок истагини билдирди.

Бугун Мисрнинг "Asas Altamir Contracting", "General Metals", "Power tech for Material Handling", "Monglish International Academy", "Edulixa360", "Hamed holding", "Bell Energy" ва "In2Metals" каби  компаниялар вакиллари юртимизга етиб келди.

Ушбу компаниялар билан ҳамкорликда сув таъминоти, таълим, туризм, геология, қурилиш соҳаларида ўзаро манфаатли лойиҳаларни тадбиқ этиш режалаштирилган.

Шунингдек, тадбир якунига кўра қурилиш материаллари ишлаб чиқариш, замонавий саноат технологияларини юртимизга жалб қилиш ва Жиззах вилоятининг экспортбоп маҳсулотларини хорижий бозорларга етказиш бўйича келишувларга эришиш кутилмоқда.