ЛОНДОН, 16 ноябрь. /"Дунё" АА/. Жорий йилнинг 11-14 ноябрь кунлари Буюк Британия Бизнес ва савдо вазирлиги билан ҳамкорликда Ўзбекистон иқтисодиёт ва молия вазирлиги бошчилигидаги делегациянинг Лондонда бўлиб ўтган "Жаҳон бозорлари сари йўл: IPO va Еврооблигациялар – "Pathway to Global Markets: IPO and Eurobonds " форумида иштироки ташкил этилди, деб хабар қилмоқда "Дунё" АА мухбири.



Форумда Лондон фонд биржаси, "Franklin Templeton Investments", "PwC", "Barclays", "Deutsche Bank", "Citibank", "J.P.Morgan", "WOOD&Co", "Santander","Fieldfisher" етакчи халқаро компаниялар ҳамда мамлакатимизнинг "UzAssaets", ОАЖ "Навоий КМК", "Uzmetkombinat", "UzAutoMotors", "Uztransgaz", "Uzneftegaz", "Uzbekinvest" компаниялари ва "Sanoatqurilishbank", "Aloqabank", "Biznesni Rivojlantirish Banki" сингари молия ташкилотлари иштирок этди.

Тадбирда Британия томонига Ўзбекистонда олиб борилаётган кенг кўламли ислоҳотлар, шу жумладан миллий иқтисодиётни ривожлантиришни қўллаб-қувватлаш борасида амалга оширилаётган чора-тадбирлар, хорижий инвесторлар учун яратилган имкониятлар ва уларнинг ҳуқуқий ҳимоясини таъминлаш бўйича қонунлар ҳамда яқинда республикада бўлиб ўтган парламент сайлови тўғрисида батафсил сўзлаб берилди.

Бундан ташқари, республикада қайта тикланадиган энергетика, кимё саноати, металлургия, электротехника, фармацевтика, озиқ-овқат саноати ва таълим соҳаларида аниқ инвестициявий лойиҳалар бўйича тақдимотлар ўтказилди.

Иштирокчилар сўнгги йилларда Ўзбекистонда инвестициявий муҳит сезиларли даражада яхшиланганлигини, халқаро компанияларнинг мамлакатимизда бизнес юритишга қизиқиши ортиб бораётганини таъкидладилар. Хориж томони, шунингдек, молия-банк, таълим, атроф-муҳитни муҳофаза қилиш, йирик давлат компанияларнинг хусусийлаштириш жараёнида қатнашишга қизиқиш билдирди.

Форум якунларига кўра, республиканинг йирик саноат корхоналарнинг келгусида Лондон фонд биржаси билан қимматли қоғозларни сотувга қўйиш ва IPOларни ўтказишга биргаликда тайёргарлик кўриш бўйича келишувга эришилди.