БУДАПEШТ, 22 октябрь. /«Дунё» АА/. Венгриянинг «Эурациа Магазине» журналида Ўзбекистон ва ЮНEСКО ҳамкорлигига бағишланган мақола чоп этилди, деб хабар бермоқда «Дунё» АА мухбири.

Унда таъкидланишича, Ўзбекистон халқаро туризмнинг муҳим йўналиши сифатида ўзини тобора фаол намоён этмоқда. Бой маданий мерос ва ноёб табиий ландшафтлар уйғунлиги саёҳатчилар учун мамлакатни Буюк ипак йўлининг чинакам хазинаси ўлароқ тақдим этаяпти.

«Бугунги кунда мамлакат ҳудудида жойлашган еттита объект, шу жумладан учта трансчегаравий объект ЮНEСКОнинг Бутунжаҳон мероси рўйхатига киритилган. Уларнинг ҳар бири туристик маршрутларни ривожлантиришда, хорижий меҳмонлар оқимини оширишга кўмаклашишда ҳамда бизнес, меҳмонхона сектори, хизмат кўрсатиш соҳаси ва транспорт инфратузилмаси учун янги имкониятлар очишда асосий роль ўйнайди», – дейилган мақолада.

Таъкидланишича, туризм шунчаки хизмат кўрсатиш соҳаси эмас, балки Ўзбекистоннинг очиқ, замонавий ва жадал ривожланаётган мамлакат сифатидаги имижини мустаҳкамлаш учун стратегик ресурсга айланмоқда.

«Ўзбекистонда Барқарор туризмни ривожлантиришга алоҳида эътибор қаратилмоқда. Табиий объектларнинг Бутунжаҳон мероси рўйхатига киритилиши ноёб экотизимларга эҳтиёткорона муносабатда бўлиш зарурлигини таъкидлайди, маданий ёдгорликлар эса тарихий меросни келажак авлодлар учун сақлаб қолиш муҳимлигини эслатади.

Шу муносабат билан, 2025 йилда Самарқанд ЮНEСКО Бош конференциясининг 43-сессиясига мезбонлик қилиши алоҳида рамзий маънога эга. Шунингдек, Бош конференцияга Самарқанднинг мезбонлик қилиши Ўзбекистон учун катта ишончдир. «Бу кенг кўламли тадбир 40 йил ичида биринчи марта Франция пойтахтидан ташқарида бўлиб ўтади. Форум дунёнинг деярли икки юзга яқин давлатидан делегатларни бир жойга жамлайди ва Ўзбекистон туризм салоҳиятини намойиш этиш учун ноёб имконият яратади», – деб ёзилган «Эурациа Магазине» мақоласи охирида.