СТОКГОЛЬМ, 1 ноябрь. /"Дунё" АА/. Марказий Осиё минтақасидаги ижтимоий-маданий ва иқтисодий жараёнларни ўрганувчи швециялик эксперт ва бизнес стратег Алекс Матрссон  "Дунё" АА учун интервьюсида Ўзбекистон Президенти Шавкат Мирзиёевнинг 30 октябрь куни Самарқандда бўлиб ўтган ЮНЕСКО Бош конференцияси 43-сессиясининг очилиш маросимидаги нутқи ҳақидаги фикрларини билдирди:

– Ўзбекистон Президенти Шавкат Мирзиёевнинг қадимий Самарқанд шаҳрида бўлиб ўтган ЮНЕСКО Бош конференциясининг тарихий 43-сессиясининг очилиш маросимидаги нутқи стратегик қарашлари ва халқаро ҳамжамиятга замонавий дунёда цивилизациялар ўртасидаги мулоқотнинг аҳамияти ҳақида илҳомлантирувчи хабари билан ажралиб турди.

Ишончим комилки, Ўзбекистон етакчиси замонавий дунёда халқаро ҳамкорлик ва барқарор ривожланишни мустаҳкамлашда маданият, таълим ва фаннинг ролини чуқур тушунган.

Президент Шавкат Мирзиёевнинг Самарқанд ташаббуслари тарихий ва маданий меросни сақлаш, ёшлар салоҳиятини ривожлантириш ва халқлар ўртасида ўзаро ҳурматни ривожлантириш бўйича асосий ғояларни ўзида мужассам этган ҳолда, глобал миқёсда маданий ва илмий дипломатиянинг ролини кучайтиришга қаратилган. Ушбу ташаббуслар, шунингдек, Самарқанднинг ноёб цивилизация меросини – дунёлар чорраҳасини – ўзида мужассам этган бўлиб, бу ЮНЕСКОнинг миссиясига тўлиқ мос келади.

Бош конференциянинг ушбу тарихий сессиясини Самарқандда ўтказиш Ўзбекистоннинг глобал гуманитар ташаббусларнинг фаол иштирокчиси сифатидаги халқаро мавқеини янада мустаҳкамлашга катта ҳисса қўшади.