ДОҲА, 21 апрель. /"Дунё" АА/. Қатарнинг оммабоп "Asian Telegraph Qatar" газетасида "КАДҲК – Марказий Осиё: минтақавий дипломатиянинг янги модели" сарлавҳали мақола чоп этилди, деб хабар қилмоқда "Дунё" АА мухбири.

Ўзбекистон Президенти ҳузуридаги Стратегик ва минтақалараро тадқиқотлар институти бўлим бошлиғи Алишер Қодиров қаламига мансуб мазкур мақолада халқаро экспертлар ҳамжамияти замонавий дунёда минтақавий дипломатия ролининг ўзгаришини диққат билан кузатиб бораётгани таъкидланган. Муаллиф кўра, турли минтақалар ўртасидаги дипломатик мулоқот нафақат халқаро алоқаларни мустаҳкамлаш, балки давлатларнинг ўзаро боғлиқлиги ортиб бораётган шароитда глобал муаммоларни самарали ҳал этишнинг асосий воситасига айланмоқда.

Шу нуқтаи назардан, Кўрфаз араб давлатлари ҳамкорлик кенгаши ва Марказий Осиё давлатлари ўртасидаги ҳамкорлик формати минтақалараро ўзаро ҳамкорликнинг ўзига хос моделини ифодалайди. Бу форматнинг ўзига хослиги шундаки, у иккита геостратегик муҳим минтақани бирлаштиради, уларнинг ҳар бири ўзига хос ривожланишга эга, лекин айни пайтда чуқур тарихий, маданий ва диний алоқаларга эга.

Таъкидланишича, икки минг йилдан ортиқ давом этган Марказий Осиё ва Арабистон ярим ороли ўртасидаги ўзаро муносабатлар бир қанча муҳим ўзгаришларни бошдан кечирди.

КАДҲК ва Марказий Осиё ўртасида тизимли дипломатик мулоқотни шакллантириш бир неча муҳим босқичларни босиб ўтди ва уларнинг ҳар бири икки минтақа ўртасидаги ҳамкорликни ривожлантиришга катта ҳисса қўшди.

2025 йил май ойида Ўзбекистонда бўлиб ўтиши режалаштирилган Иккинчи "КАДҲК – Марказий Осиё" саммитига фаол тайёргарлик бошланди. Саммит ўтказиладиган жой сифатида Марказий Осиёнинг энг қадимий шаҳарларидан бири, бой тарих ва маданий меросга эга Самарқанднинг танлангани рамзий маънога эга. Шаҳар асрлар давомида савдо алоқалари, интеллектуал тараққиёт ва халқаро дипломатиянинг асосий маркази сифатида фаолият юритиб келган.

 "Ушбу моделнинг салоҳияти икки томонлама ҳамкорлик доирасидан ташқарига чиқиб, Арабистон ярим оролидан Хитой чегараларигача бўлган улкан ҳудудда янги транспорт-логистика йўлаклари, энергия иттифоқлари ва инвестиция механизмларини шакллантириш шароитида стратегик аҳамиятга эга", – дейилган мақолада.