АР-РИЁЗ, 24 май. /"Дунё" АА/. Саудия Арабистонининг "Sahm News" электрон газетаси мухбири, "Masarat Center for Strategy & Media" маркази эксперти Абдулҳамид Ҳамид Абдуллоҳ ал-Кубби "Дунё" АА учун интервьюсида Ўзбекистон Президенти Шавкат Мирзиёевнинг 19-22 май кунлари Венгрия буюрган расмий ташрифи ва Туркий давлатлар ташкилоти норасмий саммитидаги иштироки ҳақидаги фикрларини билдирди:

–Европа Иттифоқи ва Шарқий Европа давлатлари, биринчи навбатда, Венгрия билан ҳамкорликни чуқурлаштириш Ўзбекистон ташқи сиёсатининг муҳим йўналишларидан бири бўлиб қолмоқда. Будапешт ЕИнинг фаол аъзоси сифатида Тошкент учун сиёсий, иқтисодий ва минтақавий ҳамкорликни ривожлантиришда муҳим ҳамкор ҳисобланади.

Ўзбекистон билан Венгрия ўртасидаги иқтисодий ҳамкорлик жадал ривожланмоқда. Ҳамкорликнинг асосий йўналишлари қаторига қишлоқ хўжалиги ва озиқ-овқат саноати, транспорт ва логистика, шунингдек, молия ва банк иши киради. Ўзбекистон ўзининг қулай географик жойлашуви билан Европа ва Осиё ўртасидаги таъминот занжирининг асосий бўғинига айланиши мумкин. Венгрия компаниялари Ўзбекистонга, айниқса, юқори технологиялар, яшил энергия ва инфратузилма лойиҳалари соҳаларига сармоя киритишга катта қизиқиш билдирмоқда.

Икки давлат ўртасидаги стратегик ҳамкорлик хавфсизлик, терроризмга қарши курашиш ва фавқулодда вазиятларни бошқариш масалаларини ҳам қамраб олади. Экстрадиция тўғрисидаги шартнома ва табиий офатларни бартараф этиш соҳасида ҳамкорлик тўғрисидаги битимнинг имзоланиши ўзаро ҳамкорликнинг ҳуқуқий асосларини мустаҳкамлайди. Бундан ташқари, Ўзбекистон-Венгрия халқаро ташкилотлар, жумладан, БМТ ва Туркий давлатлар ташкилоти доирасида ҳам фаол ҳамкорлик қилаяпти.

Бош вазир Виктор Орбаннинг таклифига биноан Ўзбекистон Президенти Шавкат Мирзиёев расмий ташриф билан Венгрияда бўлди. Ташриф дастуридан Венгриянинг етакчи компаниялари иштирокида бизнес-форум, Стратегик шериклик тўғрисидаги декларация имзоланган Будапешт саройида музокаралар, шунингдек, илм-фан, инновациялар ва атом энергетикаси соҳасидаги ҳамкорликни ўз ичига олган ҳукуматлараро битимлар пакетини алмашиш ўрин олди.

Ўзбекистон билан Венгрия ўртасидаги муносабатлар сифат жиҳатидан янги босқичга кўтарилди. Ҳар икки давлат ҳамкорликни, айниқса, технология ва рақамлаштириш, таълим ва илмий алмашинув, туризм ва маданий мулоқот соҳаларида янада кенгайтиришдан манфаатдор.

 Президент Шавкат Мирзиёев ва Бош вазир Виктор Орбан ўртасидаги шахсий дўстлик, олий даражадаги мунтазам мулоқотлар узоқ муддатли ҳамкорлик учун мустаҳкам замин яратади.

Ўзбекистоннинг Туркий давлатлар ташкилотининг Будапештдаги норасмий саммитидаги иштироки мамлакатнинг минтақавий жараёнлардаги роли ортиб бораётгани ҳамда Венгрия билан шериклик орқали Европа билан яқинлашаётганини яна бир бор таъкидлайди.   

 Мухтасар айтганда, расмий Тошкент ва Будапешт ўртасидаги стратегик шериклик нафақат икки томонлама ҳамкорлик, балки Марказий Осиё ва Европа Иттифоқи ўртасидаги алоқаларни мустаҳкамлаш учун ҳам янги имкониятлар очади.