БИШКЕК, 25 сентябрь. /"Дунё" АА/. Қирғизистон Жаҳон сиёсати институти директори Шерадил Бақтигулов "Дунё" АА учун интервьюсида Ўзбекистон Президенти Шавкат Мирзиёевнинг БМТ Бош Ассамблеясининг 80-сессиясидаги нутқида илгари сурилган ташаббусларнинг аҳамияти ҳақидаги фикрларини билдирди:

– Ўзбекистон Президенти Шавкат Мирзиёевнинг БМТ Бош Ассамблеясининг Нью-Йоркда бўлиб ўтган 80-юбилей сессиясидаги нутқида, шунингдек, БМТ Бош котиби Антониу Гутерриш, хорижий давлатлар ва ҳукуматлар раҳбарлари, халқаро молия институтлари ва йирик компаниялар раҳбарлари билан учрашувлар чоғида илгари сурилган таклифлари адолатга интилиш ва ўз мамлакати ҳамда бошқа халқлар манфаатларига хизмат қилади.

Шу билан бирга, Ўзбекистон раҳбарининг ташаббус ва таклифлари Марказий Осиё учун муҳим аҳамиятга эга. Бу ташаббуслар ўз мамлакати ва минтақаси манфаатларини илгари суриш билан уйғунлашгани билан ҳам аҳамиятлидир.

Фуқаро авиацияси, соғлиқни сақлаш, тоғ-кон саноати, молия, инновациялар, кимё ва фармацевтика саноатида умумий қиймати 100 миллиард доллардан ортиқ бўлган шартномалар ва истиқболли лойиҳалар портфелининг шакллантирилди. Бу Ўзбекистон ташқи иқтисодий сиёсатидаги ҳақиқий ютуқни ифодалайди.

Президент Шавкат Мирзиёев БМТ ва бошқа халқаро ташкилотлар форумларида Марказий Осиё кун тартибини изчил тарғиб этиб келаётганини ҳам алоҳида таъкидлаш жоиз.

Ўзбекистон Марказий Осиёда минтақавий ҳамкорликни ривожлантириш ва умумий минтақамизнинг геосиёсий мавқеини оширишга салмоқли ҳисса қўшмоқда. Яқин кунларда Тошкентда Марказий Осиё давлатлари раҳбарларининг еттинчи Маслаҳат учрашуви бўлиб ўтишини ҳисобга олсак, бу муҳим воқеадир.