ШАНХАЙ, 2 сентябрь. /"Дунё" АА/. Фудан университети ҳузуридаги Россия ва Марказий Осиё тадқиқотлари маркази директори ўринбосари Ма Бин "Дунё" АА учун интервьюсида Президент Шавкат Мирзиёевнинг 31 август – 1 сентябрь кунлари Хитойнинг Тяньцзинь шаҳрида бўлиб ўтган Шанхай ҳамкорлик ташкилоти саммитидаги иштироки тўғрисидаги фикрларини баён қилди:

– Ўзбекистон ШҲТ доирасида тобора муҳим роль ўйнамоқда. Мамлакатнинг ички ва ташқи сиёсатидаги стратегик тузатишлар ва чуқур ўзгаришлар нафақат унинг ривожланиши, барқарорлиги ва аҳоли турмуш шароитини яхшилаш билан бевосита боғлиқ, балки минтақавий ҳамкорликнинг бутун архитектураси ва ривожланиш йўналишларига тобора чуқур таъсир кўрсатмоқда. Ўсиб бораётган геосиёсий нотинчлик ва халқаро тартиб ўзгаришлари муҳитида Ўзбекистоннинг стратегик танлови ва ташқи сиёсий йўналишлари нафақат миллий, балки минтақавий аҳамиятга эга бўлиб, ШҲТнинг келажакдаги ривожланиш йўли ва самарадорлигини кўп жиҳатдан белгилаб беради.

Минтақавий етакчиликнинг изчил мустаҳкамланиши Ўзбекистоннинг сўнгги йиллардаги дипломатик ўзгаришлари ва ривожланишининг ўзига хос хусусияти ҳисобланади. Минтақавий масалалар ва кўп томонлама механизмларда иштирок этиш, яхши қўшничилик ва минтақавий интеграцияни фаол илгари суриш мамлакатнинг Марказий Осиёдаги таъсири ва жозибадорлигини сезиларли даражада оширди. Ушбу ижобий силжиш Ўзбекистоннинг ШҲТ доирасидаги салмоғи ва иштирокини сезиларли даражада ошириб, кун тартибини шакллантириш, қоидалар ва қарорлар қабул қилиш жараёнларида самаралироқ иштирок этиш, шу орқали минтақавий ҳамкорликка янада прагматик ечимларни жорий этиш имконини берди. Ўзбекистоннинг минтақавий низоларни ҳал этиш, мулоқот ва маслаҳатлашувларни ривожлантиришдаги конструктив роли барча иштирокчилар томонидан эътироф этилди. Марказий Осиёда ички ҳамкорликни ривожлантиришда Ўзбекистоннинг фаол позицияси ва амалий қадамлари ШҲТ доирасида минтақавий ҳамкорликни чуқурлаштириш учун қулай муҳит ва шарт-шароит яратди.

Ўзбекистон терроризмга ва экстремизмга қарши курашиш, чегараларни бошқариш ва киберхавфсизлик каби соҳаларда бой ва қимматли тажриба тўплаган, хавфсизлик соҳасида ШҲТ ҳамкорлигини ривожлантириш учун муҳим амалий мисол ва моделларни тақдим этган. Жумладан, Ўзбекистон томонидан таклиф этилган минтақавий аксилтеррор ахборот алмашиш платформасини ташкил этиш ва чегара назорати бўйича ҳамкорликни кучайтиришга оид ташаббуслар аъзо давлатлар томонидан якдил қўллаб-қувватланди. Бу ташаббуслар ШҲТ ҳамкорлигини янада прагматик ва самарали йўналишда ривожлантиришга туртки бўлди. Бундай аниқ қадамлар нафақат минтақадаги хавфсизликнинг умумий даражасини оширди, балки иштирокчи давлатлар ўртасида сиёсий ўзаро ишонч ва стратегик мувофиқликни мустаҳкамлади.

Мамлакатнинг иқтисодий ҳамкорликнинг ҳаракатлантирувчи кучи сифатидаги роли муттасил мустаҳкамланиб, кенгайиб бормоқда. Ўзбекистон тизимли иқтисодий ислоҳотлар ва очиқлик стратегиясини амалга ошириш билан бир қаторда глобал ва минтақавий иқтисодиётни бошқаришда ҳам фаол иштирок этмоқда. Шу орқали, ШҲТ доирасидаги минтақавий иқтисодий ҳамкорликка янги динамика ва туртки бағишламоқда.

Республиканинг маданий алмашинувларнинг ташаббускори сифатидаги роли алоҳида эътибор ва кенг қўллаб-қувватлашга лойиқдир. Ўзбекистон ўзининг бой маданий мероси ва кўп асрлик тарихий анъаналари билан қадимий Ипак йўлидаги муҳим цивилизация маркази сифатида ШҲТ маданий ҳамкорлигида ўзига хос ва муҳим ўрин тутади. Ўзбекистонда ўтказилаётган турли маданий тадбирлар ва илмий лойиҳалар ШҲТ доирасида цивилизациялар мулоқотининг муҳим платформалари ва муваффақиятли намуналарини тақдим этиб, минтақавий ҳамкорликни янада ранг-баранг ва халққа йўналтирилган қилиш имконини берди.

Ўзбекистон ШҲТ доирасида аъзо давлатлар ўртасида ўзаро мулоқот, тушуниш ва сиёсатни мувофиқлаштиришга кўмаклашувчи, шунингдек, қўшма консенсус ҳамда амалий ечимларни шакллантиришга ҳисса қўшувчи координатор ролини ўйнайди.

Ўзбекистоннинг барча томонлар манфаатларини мувозанатлаш ва энг олий умумий хусусиятни излаш қобилиятида намоён бўлган дипломатик донолиги мураккаб халқаро шароитда ШҲТнинг бирлигини, ҳамкорлигини ва барқарор ривожланишини сақлашга салмоқли ҳисса қўшди.

Ўзбекистон ШҲТ доирасидаги ҳамкорликка қўшган фаол иштироки ва ҳиссаси орқали нафақат ўзининг халқаро мавқеи ва минтақавий таъсирини сезиларли даражада оширди, балки ташкилот ривожига янги динамика қўшди ва инновацион ғояларни олиб кирди.