ШАНХАЙ, 11 июнь /"Дунё" АА/. Шанхай глобал бошқарув ва минтақавий тадқиқотлар академияси директори Ян Чэн "Дунё" АА учун интервьюсида Словакия Бош вазири Роберт Фицонинг 8-10 июнь кунлари Ўзбекистонга амалга ошираётган ташрифи ҳақидаги фикрларини билдирди:

– Ўзбекистон ҳам қўшни давлатлар, ҳам Европа Иттифоқи давлатлари билан икки томонлама муносабатларни фаол ривожлантирмоқда. Тошкент ва Братислава ўртасидаги кўплаб соҳалардаги ҳамкорлик сўнгги бир неча йил ичида икки давлат ўртасидаги муносабатлар жадал ривожланиш динамикасига эга бўлганини кўрсатади.

Словакия Бош вазири Роберт Фицонинг Тошкентга ташрифи чоғида имзоланган Стратегик шериклик муносабатларини ўрнатиш тўғрисидаги қўшма декларация яна бир тарихий воқеа бўлиб, ўзаро манфаатли ҳамкорликнинг замонавий ривожланишининг воқеликларига жавоб беради.

Томонлар Словакиянинг етакчи компаниялари билан агросаноат мажмуаси, автомобиль бутловчи қисмларини маҳаллийлаштириш, фармацевтика маҳсулотлари ишлаб чиқариш, шунингдек, "яшил" энергетика ва туризм соҳасидаги лойиҳаларни амалга оширишни ўз ичига олган тўлиқ кўламли Саноат кооперацияси дастурини тайёрлаш бўйича келишувга эришди. Рақамли ечимлар ва стартап инвестицияларини амалга ошириш соҳасида ноёб имкониятлар мавжуд.

Ўзбекистон-Словакия бизнес-форумининг ўтказилиши ва икки мамлакат Бош вазирларининг иштирок этиши ўзаро ҳурмат, имкониятлар ва иқтисодий ҳамкорликка эътиборга асосланган стратегик шерикликка умумий интилиш рамзидир.

Бу ташриф Европанинг Ўзбекистонга Марказий Осиёдаги иқтисодий ва сиёсий марказ сифатида қизиқиши ортиб бораётганининг сиёсий белгиси бўлиб хизмат қилади. Шунингдек, бу Тошкент ўзининг очилиш ва модернизация стратегиясини муваффақиятли амалга ошираётганидан, халқаро майдонда мустақил ва ишончли шерик сифатидаги нуфузини мустаҳкамлаётганидан далолат беради. Ўз навбатида, Братислава янги бозорлар ва ҳамкорлар билан фаол ҳамкорлик қилишга тайёрлигини намойиш этади, бу эса турли соҳаларда икки томонлама ҳамкорлик учун имкониятлар очади.

Ўзбекистоннинг ЕИ билан ўзаро ҳамкорлигини кенгайтириши, жумладан, словакиялик шериклар билан икки томонлама алоқаларни йўлга қўйиши Хитой ва Европа манфаатларини уйғунлаштириш мумкин бўлган уч томонлама ҳамкорликни шакллантириш учун кенг имкониятлар очади. Ўзбекистон Марказий Осиёдаги ўзининг стратегик географик ўрни туфайли Европа ва Осиё ўртасида йирик Евроосиё лойиҳаларини амалга оширишга кўмаклашувчи муҳим алоқа маркази ролини ўйнаши мумкин.

Хитойда Словакия Бош вазирининг ташрифи Ўзбекистоннинг минтақавий сиёсат ва жаҳон иқтисодиётидаги роли ортиб бораётганининг табиий натижаси сифатида баҳоланмоқда. Бу минтақаларнинг барқарор ривожланиши, рақамли трансформацияси ва интеграциясига қаратилган йирик Евроосиё лойиҳаларини амалга ошириш учун ноёб имконият яратади.

Шу боис Ўзбекистон Шарқ ва Ғарб ўртасидаги самарали манфаатлар мувозанатининг намунасига айланиши мумкин, бу замонавий геосиёсий ноаниқлик шароитида айниқса муҳим.