НАГОЯ, 19 октябрь. /“Дунё” АА/. Ўзбекистоннинг Нагоя шаҳридаги фахрий консули Хироюки Ито Ўзбекистон Президентининг Озарбайжонга амалий ташрифи ва ОҲИЧК саммитидаги иштироки юзасидан ўз фикр-мулоҳазаларини билдирди.

– Тинчлик ва ишонч – барқарор тараққиётга эришиш, халқаро ҳамкорликни мустаҳкамлаш ва халқлар фаровонлигини оширишнинг энг муҳим шартларидир.

Ўзбекистоннинг Марказий Осиёда яхши қўшничилик муносабатларини мустаҳкамлаш борасидаги изчил сиёсати савдо-иқтисодий алоқаларни кенгайтириш, транспорт йўлакларини ривожлантириш ва қўшма инвестиция лойиҳаларини амалга оширишга хизмат қилмоқда.

Минтақавий ҳамкорликнинг мустаҳкамланиши нафақат Марказий Осиё давлатлари, балки уларнинг халқаро ҳамкорлари, жумладан, Япония учун ҳам янги имкониятлар яратмоқда.

Япониянинг Марказий Осиё мамлакатлари билан ҳамкорлиги аллақачон мустаҳкам пойдеворга эга. 2004 йилда бошланган “Марказий Осиё + Япония” мулоқоти 2025 йил декабрь ойида Токиода бўлиб ўтган биринчи етакчилар саммитида янги суръат олди. Бугунги кунда бу ҳамкорлик инвестициялар, саноат, инфратузилма, энергетика ва малакали мутахассислар тайёрлаш каби соҳаларни қамраб олган ҳолда тобора амалий тус олмоқда.

Шу боис Ўзбекистон Президенти томонидан сунъий интеллектдан масъулият билан фойдаланиш ва иқлим барқарорлигини мустаҳкамлаш бўйича илгари сурилган ташаббуслар ҳам катта қизиқиш уйғотмоқда. Япония катта технологик ва саноат салоҳиятига эга бўлиб, бу имкониятлар шундай лойиҳаларни амалга оширишда жуда қўл келиши мумкин. Аминманки, ушбу йўналишлардаги ҳамкорликни кенгайтириш ҳар икки мамлакатнинг узоқ муддатли манфаатларига хизмат қилади.

Ўзбекистоннинг Нагоядаги фахрий консули сифатида мамлакатларимиз ишбилармон доиралари, таълим муассасалари ва жамоатчилик вакиллари ўртасидаги бевосита алоқаларнинг аҳамиятини алоҳида таъкидламоқчиман. Айнан шундай мулоқотлар сиёсий келишувларни амалий иқтисодий лойиҳаларга айлантириш, ўзаро англашувни мустаҳкамлаш ва узоқ муддатли шерикликнинг мустаҳкам пойдеворини шакллантириш имконини беради.

Президент Шавкат Мирзиёев томонидан ОҲИЧК саммитида илгари сурилган ташаббуслар Осиёдаги ҳамкорликни янада ривожлантиришга хизмат қилади ҳамда Ўзбекистон–Япония муносабатларини чуқурлаштириш ва Марказий ҳамда Шарқий Осиё ўртасидаги ўзаро боғлиқликни мустаҳкамлаш учун қўшимча истиқболларни очади.