РИМ, 27 октябрь. /“Дунё” АА/. Италия Осиё институти эксперти, халқаро сиёсатшунос Фабио Индео “Дунё” ахборот агентлигига берган интервьюсида АҚШ Давлат котиби Марко Рубионинг Ўзбекистонга ташрифи ҳақида фикр билдирди.

– АҚШ Давлат котиби Марко Рубионинг Ўзбекистонга ташрифи Тошкент ва Вашингтон ўртасидаги стратегик ҳамкорликни мустаҳкамлаш йўлидаги муҳим қадам бўлди.

Самарқандда кенгайтирилган стратегик шериклик мулоқотининг йўлга қўйилиши ҳар икки томон учун манфаатли ва унумли ҳамкорликни ўрнатишга ўзаро қизиқиш борлигини кўрсатмоқда. Рубио Ўзбекистонда фойдали қазилмаларни қазиб олиш, минтақавий ўзаро боғлиқлик ҳамда ишлаб чиқариш соҳаларидаги қўшма лойиҳаларга сармоя киритиш истагини билдирган 200 дан ортиқ Америка компанияларидан иборат делегацияга бошчилик қилиб ташриф буюрди.

АҚШ компанияларининг Ўзбекистондаги қўшма лойиҳаларга қизиқиши, айниқса, муҳим минералларни қазиб олиш ва қайта ишлаш соҳасидаги ҳамкорлик катта иқтисодий ва стратегик аҳамиятга эга эканини кўрсатади. Бундай ҳамкорлик Ўзбекистоннинг иқтисодий салоҳиятини ошириш, янги инвестицияларни жалб қилиш ва халқаро бозорлардаги мавқеини мустаҳкамлашга хизмат қилади.

Томонлар Ўзбекистоннинг улкан минерал-хомашё салоҳиятини ўзлаштириш, хомашёни қазиб олиш ва қайта ишлаш бўйича ташаббусларни амалга ошириш мақсадида АҚШ инвестицияларини жалб қилишга замин яратадиган меморандумларни имзолади.

АҚШ 2015 йилдан буён ушбу минтақавий ҳамкорлик тузилмасини илгари суриб келмоқда. 2023 йилда ушбу ҳамкорликнинг президентлар даражасига кўтарилгани ва мазкур формат доирасида “B5+1” савдо-иқтисодий платформасининг ривожлантирилаётганини инобатга олсак, Ўзбекистон ва АҚШ ўртасидаги алоқаларнинг яхшиланиши минтақавий миқёсда, хусусан, “C5+1” форматида ҳам муҳим аҳамият касб этади.

Ушбу ўзгаришларни минтақа ишларига жалб этилган Италия каби бошқа халқаро иштирокчилар ҳам кузатиб бормоқда. Бу мазкур минтақавий ёндашув ҳамкорликнинг устувор модели сифатида етакчилик қилаётганини ифодалайди.