ЛОНДОН, 9 апрель. /«Дунё» АА/. Ўзбекистон элчихонаси кўмагида ва Кинематография агентлиги билан ҳамкорликда Лондонда Соҳибқирон Амир Темурга бағишланган “Улуғ Амир ва донна Мария” фильмининг илк катта тақдимоти ўтказилади, деб хабар бермоқда “Дунё” АА мухбири.

Фильм Буюк Британия пойтахтидаги энг нуфузли ва тарихий кино масканларидан бири “Regent Street Cinema” кинотеатрида жорий йил

27 апрель куни кенг жамоатчилик иштирокида намойиш этилади.

Тақдимот доирасида фильм ижодкорлари, кино соҳаси вакиллари ҳамда хорижий меҳмонлар иштирок этиши кутилмоқда.

“Regent Street Cinema” 1848 йилда ташкил этилган. У Лондоннинг марказида жойлашган тарихий кинозал бўлиб, дунёдаги энг қадимги фаолият юритаётган кинотеатрлардан бири ҳисобланади. Кинотеатрда Буюк Британиядаги илк ҳаракатланувчи кадрларнинг (фильм) биринчи намойиши кўрсатилган. Бугунги кунда у нафақат кино намойишлари, балки маданий ва тарихий тадбирлар учун ҳам муҳим марказ вазифасини бажаради.

Мазкур премьера Ўзбекистон кинематографиясини халқаро майдонда кенг тарғиб этиш, миллий тарих ва маданий меросни дунё жамоатчилигига етказиш йўлидаги муҳим қадамлардан бири сифатида баҳоланмоқда. Бу каби тадбирлар орқали миллий кино санъати нуфузи ошиб, янги халқаро ҳамкорликлар учун замин яратилади.