АШХОБОД, 12 июнь. /"Дунё АА/. Туркманистоннинг "Turkmenportal" сайтида "Туркманистон терма жамоаси бош мураббийи Ўзбекистоннинг Жаҳон чемпионатига чиқишини минтақада футбол ривожи учун рағбатлантирувчи омил деб ҳисоблайди" сарлавҳали мақола чоп этилди, деб хабар қилмоқда "Дунё" АА мухбири.

Мақолада қайд этилишича, Ўзбекистон терма жамоасининг 2026 йилги футбол бўйича Жаҳон чемпионати йўлланмасини қўлга киритиши бутун минтақа учун яхши намуна ва ўз навбатида, минтақада истеъдодларининг кўплигини кўрсатади.

Бу ҳақда Туркманистон миллий терма жамоаси бош мураббийи Ровшан Мередов 2027 йилги Осиё кубоги саралаш турнирининг Таиланд терма жамоасига қарши ўйини олдидан ўтказилган матбуот анжуманида айтиб ўтди.

"Ўзбекистоннинг Жаҳон чемпионатига чиқиши – бу яхши намуна ва минтақамиз иқтидорларга, яхши ўйинчиларга бой эканлигининг исботи ҳамдир. Бу рағбат, бу эришилиши мумкин бўлган марра бўлиб, умид қиламанки, яқин келажакда биз ҳам унга эришамиз. Ҳеч бўлмаганда, биз бунинг учун бор кучимизни сарфлаймиз", – деб Туркманистон терма жамоаси бош мураббийи сўзларидан иқтибос келтирилган нашрда.

Шунингдек, Мередов Ўзбекистон терма жамоасининг ютуғи кўп йиллик режа асосида олиб борилган ишлар натижаси эканлигини алоҳида урғулаган: "Ўзбекистон бунга узоқ вақт интилди. Мен у ерда ҳозир ишлаётган ҳамкасбларимни биламан ва улар йиллар давомида бу пойдеворни қуришган", – деган туркман мураббий.