БИШКЕК, 1 декабрь. /“Дунё” АА/. Бишкек шаҳрида БМТнинг Наркотиклар ва жиноятчилик бўйича бошқармаси шафелигида минтақавий платформа иштирокчиларининг иккинчи йиллик конференцияси бўлиб ўтди, деб хабар бермоқда “Дунё” АА мухбири.

БМТнинг Коррупцияга қарши конвенциясини Марказий Осиёда жадал татбиқ этиш мақсадида ташкил этилган конференция минтақа мамлакатларининг ҳақиқий бирлиги ва уларнинг коррупцияга қарши кураш соҳасидаги халқаро стандартларга содиқлигини яққол намойиш этди.

Иштирокчилар шаффофлик, ҳисобдорлик тамойилларини мустаҳкамлаш, яхлит, самарали антикоррупция тизимини шакллантиришга интилишини тасдиқлади. Минтақавий платформа мамлакатлар ўртасида синергияни йўлга қўйиш, илғор тажриба алмашишга кўмаклашиш ва БМТнинг Коррупцияга қарши конвенцияси нормаларини жадал татбиқ этишда асосий восита бўлиб хизмат қилди.

Мутахассислар жиноятдан олинган даромадларни яшириш ва легаллаштириш учун крипто-активлардан фойдаланишнинг ўсиши билан боғлиқ муаммоларга алоҳида эътибор қаратди. “CABIN” ишбилармонлик ҳалоллиги тармоғи фаолияти, минтақада ташкилотчилик этикасини ривожлантиришнинг замонавий тенденциялари, давлат ва корпоратив харидлар соҳасидаги антикоррупция сиёсати ҳақидаги сўз юритилди.

Асосий масалалардан бири “Марказий Осиёда коррупцияга қарши кураш ва ҳамкорлик бўйича минтақавий чораларни кучайтириш” резолюцияси лойиҳасини муҳокама қилиш бўлди. Ушбу ҳужжат БМТнинг Коррупцияга қарши конвенциясига аъзо давлатлар конференциясининг 2025 йил декабрь ойида Доҳада бўлиб ўтадиган 11-сессиясида кўриб чиқиш учун илгари сурилиши режалаштирилган.

Резолюцияни тайёрлаш ташаббуси минтақа мамлакатларининг коррупцияга қарши биргаликда курашиш ва ишончни мустаҳкамлашга қаратилган ортиб бораётган интилишини акс эттиради.

Ушбу резолюциянинг қабул қилиниши минтақанинг халқаро ҳамкорлик тарихида муҳим босқич бўлади. У ишонч, шерикликни мустаҳкамлаш ва Марказий Осиё мамлакатларининг коррупцияга қарши курашдаги биргаликдаги саъй-ҳаракатлари самарадорлигини ошириш учун кучли туртки бўлиши мумкин.