ТОШКЕНТ, 18 октябрь. /“Дунё” АА/. Руминия элчиси Даниел Кристан Чобану “Дунё” ААга берган интервьюсида Ўзбекистон халқини 21 октябрь куни нишонланадиган Ўзбек тили байрами куни билан табриклади:

– Барча ўзбекистонликларни Ўзбек тили байрами куни билан самимий табриклайман. Ушбу тадбирда иштирок этиш мен учун катта шараф.

Миллий тилни ривожлантириш Ўзбекистоннинг маданий ва тарихий меросини асраб-авайлашда улкан аҳамиятга эга, деб ҳисоблайман. Ўзбекистон – буюк ўтмишга эга мамлакат ва унинг бугунги куни ҳам ҳайратланарли. Бундай ажойиб мамлакатда ишлаш мен учун катта шараф ва унинг келажаги янада порлоқ бўлишига ишончим комил.

Тил ниҳоятда муҳим, чунки у халқлар ўртасида кўприк вазифасини ўтайди. Алишер Навоий каби буюк мутафаккирлар яшаб, бой ўзбек тилида ижод қилган диёрда бўлишнинг ўзи бир бахт. Юқорида айтганимдек, тил ҳамкорлигимиз учун янги имкониятлар эшигини очади.

Ўзбек тилини қўллаб-қувватлашга оз бўлса-да, ўз ҳиссамни қўша олганимдан жуда хурсандман. 2022 йилда, Ўзбекистон мустақиллиги куни арафасида, 4083 метр баландликдаги Ҳазрати Султон чўққисига кўтарилганимни катта мамнуният билан эслайман. У ерда ўзбек халқини миллий байрам билан табриклаб, ўзбек тилида видеомурожаат йўллаган эдим. Бу видеони интернетдан топиш мумкин.

Ўзбек тили жуда гўзал ва бой туркий тил бўлиб, унинг аҳамияти кундан-кунга ортиб бормоқда. Бу Ўзбекистоннинг халқаро нуфузи сезиларли даражада мустаҳкамланиб бораётгани билан ҳам боғлиқдир.

Тилни асраш ва ривожлантириш – ўз маданияти ҳамда маданий меросини асраб-авайлаш ва ривожлантириш демакдир.

Шу боис мазкур байрам катта аҳамиятга эга. Ўзбекистонда ишлаш ва ўзбек тилида ҳеч бўлмаганда бир неча сўз айтиш имкониятига эга бўлганимдан мамнунман. Умид қиламанки, яқин ойларда ўзбек тили бўйича билимимни янада мукаммаллаштира оламан.