ТОШКЕНТ, 17 октябрь. /“Дунё” АА/. Жорий йилнинг 15 октябрь куни Ўзбекистон Ташқи ишлар вазирлигида ходимларнинг давлат тилида расмий иш юритиш ҳамда ёшларнинг саводхонлик кўникмаларини янада ривожлантиришга қаратилган кенг қамровли диктант машғулоти бўлиб ўтди, деб хабар бермоқда “Дунё” АА мухбири.

Мазкур ташаббус Ўзбекистон Вазирлар Маҳкамасининг Давлат тилини ривожлантириш департаменти мувофиқлаштируви остида бутун республикамизда ўтказилаётган умуммиллий диктант тадбири доирасида ташкил этилди.

Тадбирдан кўзланган асосий мақсад вазирлик ва идораларда давлат тили тўғрисидаги қонун ҳужжатлари ижросини тизимли таъминлаш, хусусан лотин алифбосига асосланган ўзбек адабий тили қоидаларига қатъий риоя қилинишига эришишга қаратилган.

Шу боис, кўтаринки рухда ўтказилган тадбирда ТИВ турли таркибий тузилмалари ходимларининг нафақат имло қоидаларини тўғри қўллаш маҳорати, балки давлат тилида ҳужжатларни бехато ва профессионал даражада расмийлаштириш кўникмалари ҳам атрофлича баҳоланади.

Она тилимизга бўлган юксак эътибор, бу борада дипломатлар жамоасида изчил ташкил этилаётган чора-тадбирлар сўнгги йилларда юртимизда ўзбек тилининг нуфузини янада юксалтириш борасида олиб борилаётган умумдавлат ислоҳотларининг узвий бир қисмидир.

Айниқса, хорижий давлатлар ва халқаро ташкилотлар билан олиб бориладиган олий даражадаги учрашувлар, музокаралар ҳамда имзоланадиган икки ва кўп томонлама битимларда ўзбек тилининг фаол қўлланилиши миллий ўзликни англашнинг бош мезонларидан бирига айланди.

Дипломатик доираларда тилга бўлган юксак эътибор ва соф ўзбек тилида мулоқот қилиш маданияти халқаро майдонда Ватанимизнинг нуфузи ва обрў-эътиборини янада оширишга хизмат қилади.

Ташқи ишлар вазирлиги раҳбарияти томонидан доим таъкидлаб келинаётганидек, вазирлик тизимида фаолият юритаётган ходимларнинг профессионал, интеллектуал ва лингвистик маҳоратини доимий равишда ривожлантириб бориш, она тилимизни асраб-авайлаш, унинг бой имкониятларидан тўғри фойдаланиш, давлат тили тўғрисидаги қонунчилик талабларини сўзсиз бажариш устувор вазифалардан бўлиб қолади.

Шу мақсадда ходимларнинг ёзма нутқ маданиятини оширишга қаратилган бу каби маърифий ва амалий тадбирлар изчил ва тизимли равишда давом эттирилади.

Ушбу тадбир иштирокчиларнинг ишлари ўрнатилган тартибда баҳоланиб, ғолиблар 21 октябрь–Ўзбек тили байрами куни арафасида тегишли совринлар билан тақдирланади.