ЛОНДОН, 19 декабрь. /"Дунё" АА/. Ўзбекистон элчиси Равшан Усмонов Буюк Британиянинг "The Weir Group plc" компанияси вакили Ражен Говендорни қабул қилди, деб хабар қилмоқда "Дунё" АА мухбири.

Мулоқот давомида "Weir Minerals" компанияси томонидан Ўзбекистон тоғ-кон саноати ва геология соҳасидаги лойиҳаларга техник жиҳатдан амалий кўмак кўрсатилиши ва айрим конлар ишини йўлга қўйиш масалалари муҳокама қилинди.

Музокаралар якунида "The Weir Group plc"нинг Ўзбекистондаги фаолиятини кенгайтириш масаласини тегишли давлат ташкилотлари билан батафсил муҳокама қилиш бўйича келишувга эришилди.

"The Weir Group plc" халқаро муҳандислик компанияси 1871 йилда ташкил этилган. Компания штаб-квартираси Шотландиянинг Глазго шаҳрида жойлашган. У қазилма бойликлар, нефть-газ ва энергетика саноати учун жиҳозлар ишлаб чиқариш ҳамда хизмат кўрсатишга ихтисослашган.

Мазкур компания 2022 йилда Ўзбекистон бозорига кириб келган ва мамлакатимиз тоғ-кон саноатида бир қатор лойиҳаларни муваффақиятли амалга оширган.

Бундан ташқари, компания 2024 йилда Олмалиқ тоғ-кон металлургия комбинати билан қўшма лойиҳани амалга ошириш мақсадида Британиянинг Экспортни молиялаштириш агентлигидан 12,6 миллион евро миқдоридаги кредитни жалб қилди.