ҚОҲИРА, 8 февраль. /"Дунё" АА/. Ўзбекистон элчихонаси кўмагида "Ўзтўқимачиликсаноат" уюшмаси раисининг биринчи ўринбосари Мирмуҳсин Султонов ва Мисрнинг "JQSWAQ" компанияси бош директори Мансур Ғафри ўртасида онлайн учрашув бўлиб ўтди, деб хабар бермоқда "Дунё" АА мухбири.

Айтиш жоизки, "JQSWAQ" компанияси Мисрдан АҚШга тўқимачилик маҳсулотларини экспорт қилишга ихтисослашган бўлиб, ҳозирда Ўзбекистон текстиль саноати корхоналари билан ҳамкорлик қилишга қизиқиш билдирмоқда.

Компания вакиллари ўз тадқиқотларидан келиб чиққан ҳолда, Ўзбекистоннинг пахтаси ҳамда юқори сифатли ип-калава ва тайёр кийим-кечакларни харид қилишда амалий ёрдам сўради.

Суҳбат давомида Маннсур Ғафри "JQSWAQ" компанияси ўз маҳсулотларининг хорижга экспорти кўламини ошириш, янги бозорларга чиқиш ҳамда чет эллик ҳамкорлар сафини кенгайтиришга алоҳида эътибор қаратаётганини таъкидлади.

Компания вакили билан келгусида ҳамкорликни давом эттириш ва Ўзбекистондаги корхоналар билан алоқаларни йўлга қўйиш, дастлабки товарлар партиясини экспорт қилишга келишиб олинди.