ҚОҲИРА, 20 октябрь. /“Дунё” АА/. Мисрнинг олтита компанияси вакиллари Ўзбекистон дипломатлари билан қишлоқ хўжалиги, чорвачилик, суғориш ва янги ерларни ўзлаштириш соҳаларидаги қўшма лойиҳалар истиқболларини муҳокама қилдилар, деб хабар бермоқда “Дунё” АА мухбири.

Учрашувда “Famot”, “Delta”, “Modern Farming”, “SOBEK”, “Fruits” ва “Pureland” компаниялари вакиллари иштирок этдилар. Миср томони айлана суғориш тизимларини (пивотлар) жорий этиш, чорвачиликни ривожлантириш, озуқа базасини яратиш ҳамда қишлоқ хўжалиги маҳсулотларини етиштириб, кейинчалик уларни экспорт қилишни ташкил этиш бўйича қўшма лойиҳаларни ишлаб чиқишга тайёрлигини билдирди.

Шунингдек, компаниялар Ўзбекистон ҳудудларида янги ерларни ўзлаштириш ва қишлоқ хўжалигини ривожлантириш лойиҳаларида қатнашиш истагини қайд этдилар

Музокаралар якунида ҳамкорлик истиқболларини ўрганиш ҳамда аниқ лойиҳаларни ишлаб чиқиш учун яқин кунларда Миср мутахассисларининг Ўзбекистонга ташрифини ташкил этиш бўйича келишувга эришилди.