ГУАНДУН, 31 октябрь. /"Дунё" АА/. Ўзбекистон Бош консулхонаси томонидан Гуандун провинциясининг "Guangdong General Chamber of Commerce" палатаси ижрочи президенти Го Юй Кунь бошчилигидаги ҳудуд компаниялари вакилларидан иборат делегациянинг Ўзбекистонга бизнес-миссияси амалга оширилди, деб хабар қилмоқда "Дунё" АА мухбири.

Хитой томони сафар давомида Ўзбекистон Инвестициялар, саноат ва савдо вазирлиги, Тошкент шаҳар ҳокимлиги ва Миллий иқтисодий ҳамкорлик уюшмаси вакиллари билан музокаралар ўтказди.

Музокаралар доирасида қўшма инвестициявий лойиҳаларни ишлаб чиқиш, Хитой бозорига қишлоқ хўжалиги маҳсулотлари экспортини кенгайтириш истиқболлари муҳокама қилинди.

Шунингдек, бизнес-миссия аъзолари Тошкент шаҳрида жойлашган кичик саноат зоналарида бўлиб, у ерда инвесторлар учун яратилган қулай имкониятлар билан танишди.

Сафар давомида Ўзбекистон Миллий иқтисодий ҳамкорлик уюшмаси ва "Guangdong General Chamber of Commerce" палатаси ўртасида ҳамкорлик меморандуми имзоланди.

"Guangdong General Chamber of Commerce" палатаси 2003 йилда ташкил этилган. Палата 2000 га яқин компанилар манфаатларини ҳимоя қилади.