АБУ-ДАБИ, 15 июнь. /“Дунё” АА/. Мамлакатимиз дипломатлари томонидан БААнинг саноат соҳасидаги етакчи компанияларидан бири бўлган “RAK Ceramics” бош директори Абдуллоҳ Массад билан музокара ўтказилди, деб хабар бермоқда “Дунё” АА мухбири.

Мулоқот давомида Ўзбекистонда қурилиш материаллари саноатини ривожлантириш, ички бозор учун юқори қўшимча қийматга эга маҳсулотлар ишлаб чиқаришни йўлга қўйиш, тизимга замонавий инновацион технологияларни жорий этиш ҳамда инвестициявий ҳамкорликни кенгайтириш масалалари атрофлича муҳокама қилинди.

Амирликлар вакилларига мамлакатимизда амалга оширилаётган изчил иқтисодий ислоҳотлар, хорижий инвесторлар учун яратилган қулай имтиёз ва шарт-шароитлар ҳамда қурилиш материаллари ишлаб чиқариш соҳасининг мавжуд хомашё салоҳияти ҳақида батафсил маълумотлар тақдим этилди.

“RAK Ceramics” бош директори Абдуллоҳ Массад Ўзбекистон иқтисодиётининг жадал суръатлар билан ривожланаётганини, айниқса, қурилиш ва инфратузилма соҳаларидаги кенг кўламли лойиҳалар хориж сармоядорлари учун мамлакат бозорининг жозибадорлигини сезиларли даражада ошираётганини алоҳида таъкидлади.

Учрашув давомида томонлар инвестициявий ҳамкорликнинг аниқ йўналишлари ва истиқболли лойиҳа шартларини қўшимча равишда чуқур ишлаб чиқиш ҳамда ўзаро алоқаларни изчил давом эттириш юзасидан келишувга эришди.

1989 йилда Рас Ал-Хайма амирлигида ташкил этилган “RAK Ceramics” дунёдаги энг йирик керамика маҳсулотлари ишлаб чиқарувчилардан бири ҳисобланади. Компания керамика плиткалари, санитария-техника буюмлари ҳамда чинни идишлар ишлаб чиқаришга ихтисослашган бўлиб, жаҳоннинг 150 дан ортиқ мамлакатларида ўз фаолиятини юритади.