АЛ-КУВАЙТ, 29 апрель. /"Дунё" АА/. 23-24 апрель кунлари соғлиқни сақлаш, фармацевтика, чорвачилик, қишлоқ хўжалиги, кредитлаш, шунингдек, автосаноат ва хизмат кўрсатиш йўналишларида фаолият юритаётган Кувайт компаниялари вакиллари "Халқаро бизнес-форум Жиззах – 2025" да қатнашди, деб хабар қилмоқда "Дунё" АА мухбири.

Делегация аъзоларини Жиззах вилояти ҳокими Улуғбек Мустафоев қабул қилди. Кувайтлик тадбиркорлар билан мулоқот чоғида вилоят ҳокими уларни қизиқтирган барча саволларга атрофлича жавоб берди. Томонлар, шунингдек, истиқболли ҳамкорлик йўналишларини муҳокама қилдилар.

Тадбир доирасида Шароф Рашидов тумани ҳокимлиги ва "Biomedix Medical Group Co." компанияси ўртасида туман ҳудудидаги шифохона биносида тиббий лаборатория фаолиятини ташкил этиш бўйича vеморандум имзоланди.

Кувайтлик инвесторлар Жиззах вилоятида қишлоқ хўжалиги маҳсулотларини етиштириш ва қайта ишлаш, чорвачиликни ташкил этиш ҳамда туризм комплексларини барпо этиш истиқболли йўналиш эканлигини таъкидладилар.

Мухаммад Сақиб Афтаб, "KFH Capital" компанияси вице-президенти:

– Бугунги жаҳон капитал бозоридаги хавф-хатарлардан келиб чиқиб, бундай тадбирларнинг ўтказилиши ва йирик молиявий ташкилотлар ҳамда инвесторларнинг мамлакат ҳудудларига таклиф этилиши жуда муҳим.

Абдулла Элараби, "Gulf Care General Trading Co." компанияси тиббий лаборатория хизматлари ва уларни ташкиллаштириш бўйича менежери:

– Зомин тумани бизнес-форум ўтказиш майдони сифатида бежиз танланмади, деб ўйлайман. Бу ҳудуд мазкур тадбирга бошқа соҳалардан таклиф этилган инвесторлар учун ҳам Ўзбекистоннинг туризм салоҳиятини ёрқин намойиш этиб берди. Форум кўплаб инвесторларда меҳмонхона бизнеси, туристик хизмат кўрсатиш, кўнгилочар марказлар қуриш соҳаларига сармоя киритишга қизиқиш уйғотди. Биз ҳам унда тақдим этилган имкониятлардан келиб чиқиб "Biomedix Medical Group Co." компанияси билан ҳамкорликда Жиззах вилояти Шароф Рашидов туманидаги лойиҳани амалга ошириш, маҳаллий аҳоли ва сайёҳларга замонавий тиббий хизмат кўрсатишни йўлга қўйишга қарор қилдик.