АР-РИЁЗ, 20 январь. /"Дунё" АА/. Ўзбекистон элчихонаси томонидан мамлакатимизнинг савдо-иқтисодий, сармоявий ва сайёҳлик салоҳиятини намойиш этишга қаратилган тақдимот ташкил этилди, деб хабар қилмоқда "Дунё" АА мухбири.

Тадбирда Саудия Арабистонида фаолият юритадиган ҳамда Ўзбекистон билан ҳамкорликни ривожлантиришга қизиқиш билдирган етакчи яманлик тадбиркор ва инвесторлар иштирок этишди.

Иштирокчиларга Ўзбекистонда тадбиркорлик билан шуғулланиш учун яратилган қулай шарт-шароитлар, жумладан, инвестиция имкониятлари ва хорижий компаниялар учун тақдим этилаётган солиқ ва божхона имтиёзлари, иқтисодиётнинг муҳим тармоқларининг ривожланиш истиқболлари ҳамда мамлакатимиз раҳбарияти томонидан амалга оширилаётган кенг кўламли ислоҳотлар ҳақида батафсил маълумот берилди.

Тадбиркорлар бизнес юритишнинг ҳуқуқий жиҳатлари, логистика, молиявий қўллаб-қувватлаш ва инвестиция соҳасидаги давлат сиёсати бўйича ўзларини қизиқтирган саволларга элчихона вакилларидан тўлиқ жавоб олдилар.

Томонларни қизиқтирган лойиҳалар ва соҳалар бўйича алоҳида учрашувлар ташкиллаштириш ҳамда Ўзбекистоннинг ишбилармон доиралари вакиллари билан тўғридан-тўғри алоқалар ўрнатиш юзасидан келишиб олинди.

Шунингдек, мазкур тадбиркорларнинг Ўзбекистонга ташрифини амалга ошириш бўйича келишувга эришилди.