ВАРШАВА, 27 июнь. /"Дунё" АА/. Ўзбекистон элчиси Амирсаид Агзамходжаев Польша инвестициялар ва савдо агентлиги президенти Анжей Диха билан учрашув ўтказди, деб хабар қилмоқда "Дунё" АА мухбири.

Музокаралар давомида Ўзбекистон ва Польша ўртасидаги савдо-иқтисодий соҳада икки томонлама ҳамкорлик ҳолати ва истиқболлари, хусусан республика ҳудудида Польша капитали иштирокида инвестициявий лойиҳаларни амалга ошириш имкониятлари муҳокама қилинди.

Томонлар жорий йилнинг кузида Тошкентда ўтказилиши режалаштирилган Иқтисодий ҳамкорлик бўйича ҳукуматлараро комиссиянинг 8-йиғилиши доирасида ўтказиладиган бизнес-форумга ҳар томонлама ва пухта тайёргарлик кўриш муҳимлигини таъкидладилар.

Музокаралар якунида мазкур тадбир доирасида Польша инвестициялар ва савдо агентлигининг Тошкентдаги ваколатхонасини очиш маросимини ташкил этишга келишиб олинди.