АНҚАРА, 19 сентябрь. /“Дунё” АА/. Туркиялик ёзувчи Эрнаил Коч Ўзбекистонга қилган сафаридан сўнг ўз таассуротларини Туркиянинг “Gümüşhane” маҳаллий газетасида сўзлаб берди, деб хабар бермоқда “Дунё” АА мухбири.

Муаллиф маҳаллий аҳолининг Туркиядан келган меҳмонларга бўлган самимий ва иссиқ муносабати ҳақида ёзган. Унинг сўзларига кўра, “Биз турклармиз, Туркиядан келдик” дейилиши билан ўзбекистонликлар сайёҳларни чин дилдан қутлаб, уларнинг зиёратлари қабул бўлишини тилайдилар.

Ёзувчи Ўзбекистонни қардош мамлакат ва “очиқ осмон остидаги музей” деб атаб, туркияликларга ушбу юртга тез-тез ташриф буюришни тавсия этган.

Унинг таъкидлашича, мамлакатда маданий ва зиёрат туризмига, исломий ёдгорликларни қайта тиклаш ҳамда меҳмонхона соҳасини ривожлантиришга алоҳида эътибор қаратилмоқда. Муаллиф сўнгги йилларда ЮНЕСКО, Туркия ва бошқа давлатлар кўмагида зиёрат туризмига 4 миллиард долларгача инвестиция киритилганини қайд этган.

Ёзувчи кенг ва озода йўллар, етарли даражадаги автотураргоҳлар ва санитария-гигиена шохобчалари ҳамда тизимли йўлга қўйилган темир йўл қатновини эътироф этган. Шу билан бирга, у ўз кузатувларига таяниб, интернет инфратузилмаси ҳозирча муайян чекловларга эга эканини билдирган.

Сафар давомида муаллиф Ибн Сино, Хоразмий, Маҳмуд Замахшарий ва Беруний каби буюк алломаларнинг асарлари сақланаётган музейда бўлган. Шунингдек, у қуёш энергетикаси объектлари қурилиши, саноат ва қишлоқ хўжалиги ривожига ҳам эътибор қаратган.

Ёзувчи олий таълим тизимининг кенгаяётганини алоҳида таъкидлаган. Мисол тариқасида Бухорони келтириб, янги давлат ва хусусий олий ўқув юртларининг очилиши эвазига университетлар сони 3 тадан 21 тага етганини қайд этган.

Ёзувчи ўз сафарномасини якунлар экан, “XXI аср Туркий дунё асри бўлади”, дея қайд этган.