АР-РИЁЗ, 21 апрель. /"Дунё" АА/. Саудия Арабистонининг "Sahm News" газетасида "Harvard Growth Lab: 5 йил ичида Ўзбекистон иқтисодий мураккаблик рейтингида 25 поғонага кўтарилди" сарлавҳали мақола эълон қилинди, деб хабар қилмоқда "Дунё" АА мухбири.

Унда Иқтисодий тадқиқотлар ва ислоҳотлар маркази Гарвард университети тараққиёт лабораториясининг Иқтисодий мураккаблик индексини таҳлил қилгани ҳақида маълум қилинган.

Қайд этилганидек Гарвард университетининг Тараққиёт лабораторияси Иқтисодий мураккаблик индекси (ECI) натижаларини нашр қилди, унда экспортнинг технологик мураккаблиги ва экспортни диверсификация қилиш асосида мамлакатлар рейтинги тузилган.

"Мазкур рейтингда Ўзбекистон сўнгги 5 йил ичида 25 поғона юқорилаб, 145 та мамлакат орасида 80-ўринни эгаллаб, Иқтисодий мураккаблик рейтингида ўз мавқеини сезиларли даражада яхшилади. Мамлакат иқтисодиёти барқарор ўсишни кўрсатмоқда, экспорт йилига ўртача 20,5%га ўсди, бу минтақадаги мамлакатларининг бошқа мамлакатларидаги ўсиш суръатларидан анча юқори", – деб таъкидланган материалда.  

Мақолада ёзилишича, 5 йил давомида экспорт ўсишига ўрта қайта ишланган саноат товарлари катта ҳисса қўшган бўлиб, ишлаб чиқариш янада мураккаброқ бўлган маҳсулотлар ичида энг юқори ўсиш суръатлари транспорт (89%), саноат ускуналари (77%), электротехника (59%) бўйича қайд этилган. Экспорт портфелига 67 та янги маҳсулот қўшилиб, бу мамлакатга 2,1 миллиард доллар даромад келтирган.

"Sahm News" газетасида босилган мақолада, шунингдек, 2033 йилгача Ўзбекистон иқтисодиётининг йиллик ўртача ўсиши 5,6%ни ташкил этиши ва бу эса дунёда иккинчи юқори кўрсаткич эканлиги ҳам алоҳида қайд этилган.