ИСЛОМОБОД, 8 октябрь. /“Дунё” АА/. Покистоннинг нуфузли “Global News Pakistan” ахборот агентлиги сайтида Ўзбекистон ва Туркманистон ўртасидаги стратегик шериклик муносабатларига бағишланган мақола эълон қилинди, деб хабар бермоқда “Дунё” АА мухбири.

Мақола муаллифининг қайд этишича, Авазада бўлиб ўтадиган Марказий Осиё давлатлари ва Озарбайжон раҳбарларининг саккизинчи Маслаҳат учрашуви Ўзбекистон–Туркманистон муносабатларига алоҳида мазмун бағишлайди.

Нашрда икки томонлама муносабатларнинг ҳуқуқий пойдевори 1996 йилдаги Дўстлик шартномасига бориб тақалиши, янги босқич эса 2017 йил март ойида Президент Шавкат Мирзиёевнинг Туркманистонга амалга оширган илк давлат ташрифи ва стратегик шериклик тўғрисидаги ҳужжатнинг имзоланиши билан бошлангани урғуланган. 2022 йил 21 октябрда имзоланган Декларация эса интилишларини янада мустаҳкамлади. Бу сиёсий курснинг изчиллиги олий даражадаги мунтазам мулоқотлар, жумладан, Туркманистон Президенти Сердар Бердимуҳамедовнинг 2025 йил ноябрь ойида Ўзбекистонга қилган давлат ташрифи доирасида чегараолди савдоси, қишлоқ хўжалиги ва соғлиқни сақлаш соҳаларида эришилган келишувларда яққол намоён бўлмоқда.

Мақолада икки томонлама яқинлашувнинг моддий асоси товар айирбошлаш ҳажмининг жадал ўсишида кўринаётгани қайд этилган. Хусусан, савдо ҳажми 2017 йилдаги 177,9 миллион доллардан 2025 йилда 1,2 миллиард долларга етган. 2026 йил январь–август ойларида эса инклюзив кўрсаткич 807,4 миллион долларни ташкил этди. Шунингдек, 2025 йил 25 февралдан бошлаб амал қилаётган эркин савдо режими ва транспорт-транзит соҳасидаги лойиҳалар ҳамкорликни янада кенгайтирмоқда.

Якунда расмий Тошкент ва Ашхобод ўртасидаги шериклик минтақавий хавфсизлик ва барқарор ривожланишнинг умумий архитектурасига салмоқли ҳисса қўшаётгани алоҳида таъкидланган.